Koktisal phaikheno UTF ni volunteer rok Sunday School khwlainani nongkhoro, Sunday School ni yangtwi kwrwi chwrai rokno magwnang phwrwngo, abono karwi bo kwrwi chwrai rokno nangkukmani bijab tei stationary rokbo bàgwi yo. Dopha hamkwrai ni samungo Sunday School wngkha UTF ni tei kaisa yapri.
Thanai bisi 2022 ni August talo East Twipra bai baksa UTF(United Tiprasa Forum) koklam salai phuru, Chwng aphuru Bg. Sajal Debbarma, Senior Advisor, UTF ni Exclusive Interview namani, tei chwng article bo publish khaikha abono twywi, bo bai salaimani jotto kokrokno no article o bo sanani naikha, phiya aphuru kaisa topic no cover khaijak liya, Bg. Sajal Debbarma tò excited wngwi no sakha chwngno, O Program ni kok, haiphano abo aswk importance ni kokya hwnwi chwng article o tonnani hwnwi salailiya. Abo wngkha UTF ni Sunday School Program, bo chwngno O naharmung bahai khe phaikha, tei sabo eba bobo no naywi chengjakna kwlaikha, Bo sakha koktisal brum-brum khristan rok borog ni chwrai poito khaina rokno girja wngma logi logi no chwrai rokno Kaitor ni kok kwbangma Picture books, rwchabmung tei khwnathok kothoma saui phwrwngo, aphuru obo aswk nangkuk gwlak hwnwi uansuklaimani, phiya tabuk uansuk naywi abo belai nangmani hai ma tongo, tamni hwnkhe A program twi koktisal brum-brum UTF ni volunteer rok kwrwi cherai rokno jotto tongtharni borok rokno no magwnang phwrwngo tei nangkukmani stationary rokno bo bàk nani samung khayu.
From the Editor:
Chukjakya chwrai rokni bagwi O salsa ni nangkukma swrwngmungno belai kotor khuk, tamni hwnkhe abo phano se baksa manya tongu, je thai yo UTF ni volunteer rok sogwi manya, aroni chukjakya hapang bai naikoljak rwngnokrogo poriui tongnai chwrai rok, essential eba nangkukmani swrwngmung phano se manna tugo, tamo ni hwnkhe hachwk besero hapang bai naikoljak rwngnokrogni phwrwngmung rok bwtwi abo chwng kaham khe no saimanu. Abono twywi no UTF ni bwkhak twi kaisa chaitokmung obo belai kotor kukya wng phano mungsa swk le khaijagwi tongu. Chwng sijak nugjak borok rokni bo obono kaisa barja tongu, je chwng bo salsa swk phano khao chongwi, tini le ani Dopha ani Borok rokni bagwi ang bo chukjakya chwrai rokno salsa ni bagwi phano magwnang phwrwngnai hwnwi, abo tw khailai te khailai te salsa chwng bo kotor bosong wngwi manna nw.
Support East Twipra by Donating to our efforts with the QR code provided in the post or through this UPI ID : swngchar11@oksbi
Tags
Kokbwkhal