Statehood sanmungno twywi Ongkhorkha lamao Ladakh ni lukurok.

"Ladakh O bisi brwyo(4) tekto manmahai laithangnai bisi snichi(70) O phano amswk Manya khu"

Bisi bwrwi swkang Article 370 norjakma bai, Jammu and Kashmir ni kagwi Ladakh kwtal Haktor Hapangni naikolmungo tubujago eba Union Territory swnam rwjago. Aphuru obono twywi Ladakh ni luku rokni bwkhao belai khatung-khajamung rokbo nugjakha. Phiya tabukhe tamo wngwi Khadujak luku rog? Tangwi lamao nongkhor laijak tei Delhi ni Jantar Mantaro phaywi tangwi 6th Schedule tei Statehood ni khorang kasajak?

Ladakh ni lukurokni abono sanmung, Ladakh ni tongkosong lukurogno mwthangna bagwi Ladakh no 6th Schedule ni bisingo tubujakna wngthung tei Ladakh no Haste ni sinimung rwjakna wngthung hwnwi.

Kwdwkma bisi romwi Ladakh ni luku rok Ladakh no UT swnamna bagwi khorang tisalai tongmai, abono twywi 1995 bisio Ladakh Autonomous Hill Development Council (LAHDC) hwnwi swnam rwjakha, aro khoroknwichidok(26) chongjak tei khorokbrwi (4) nominated adong rok tongu. Ladakh ni hamkwrai ni samung no tabuk aroni luku rokno tangwi mannai hwnwi chonglai tongmani, phiya abo bai kwbangkuk samung khaywi manya hwnwi luku rokbo saiman tongu, aboni bagwi no borog UT ni sanmung no mwthak lailiya. 31 October, 2019 ni sal tabuk bo muitu man bai na aphuru no Ladakh no Jammu Kashmir ni khagwi kwtal UT swnam rwjagu.

Ladakh ni lukurok Article 370 norjakna swkangno Legislative phan bai Union Territory nangu hwnwi sanwi tongmani, phiya 2019 no Article 370 borjak phru Ladakh tei Jammu Kashmir no Union Territory swnam rwjakha, haiphano Jammu Kashmir Legislative phan bai UT swnamjakha, yang Ladakh khe Legislative phan no karwi.

Luku rokni kok silsamung abono "Agi Article 370 tongma bagwi Union Territory Manya wngwi tongphano aboni bagwi borog ni ha tei borog rok mwthangjak tongmani, phiya tabuk Article 370 kwrwi ni bagwi borog ni Ha, Hukumu tei tongkosong tomung bebak kirimasingsa Thai o sokphaijak".

Sonam Wangchuk, khoroksa Rwngswrwngmung ni twywi samung khainai (Educational Reformer), bo sao, "Ladakh belai Ecologically kwlwi. Chwng Ladakh no Legislative phan bai UT swnam di hwnwi sanmani, haiphano mankha abono karwi, chwng wansukha abo lamao phaywi tongna hwnwi, abono twywi no chwng BJP no kwplai khaimani, phiya tabuk borok 6th Schedule ni twi mung kok sana nailiya" hwnwi.

Bisi tham swkango, Leh Apex Body mungwi kaisa bodol tei Kargil Democratic Alliance (KDA) mungwi bodol, thansa phaywi Haste ni sinimung ni bagwi eba Stetehood ni bagwi, Ladakh no Constitution ni 6th Schedule ni bising darwna bagwi, bukcha Thai rokno supung rwna bagwi tei kainwi Loksabha tei kaisa Rajya Sabha achukthai swnamjakna bagwi sanmungo nongkhor laimani.

Luku rok o Choba no Thinang ni bosong rokni bagwi Choba bo hwnwi tongu, Borokni ha tei tonghaphar rokno mwthang narwkna bagwi, borog ni tongkosong tomung tei Haphar ni kaham ni bagwi Choba. Phiya tabuk obono naithai, phanai bisi 2024 o Haktoro Lok sabha ni chongbari tongu, Ladakh ni lukurokni khorang no Hapango tongwi tongnai borok rok borogni khorang de khna horno, jora se saiman sinai.

@easttwipra.in no follow khaidi Kokborok bai Hayung gwnangni koktwma manna bagwi.

Support East Twipra Support Kokborok Journalism by Donating to our small efforts with the QR code provided in the post or through this UPI ID : swngchar11@oksbi