Aguli'o luajijakha Global Youth Film Festival, phiya Tripurani kaisa phano film aro batailiya.

Chasalo, agulini Don Bosco Schoolo, Global Youth Film Festival luwajijakha aro kainwichitham (23) haktorni kaibachinwi (52) filmrok rokni bwskango phunukjaknani bagwi chongwi najakha. Kwplai wngnai film khok 87 rasai (lakh) eba €1,000 Euro ni sokat mannai.

Tini chasal 14 Octobero Don Bosco Global Youth Film Festival salsa ni bagwi Don Bosco School, Agartalao luwajijakha, aro kainwichitham (23) haktor ni kaibachinwi (52) filmrokno lukurokni bwskango phunukjakna bagwi chongjakha. O Film festivalo kwplai wngnai film, khok 87 rasai (lakh) eba €1,000 Euro mannai hwnwi bo sakhlaijakha DBGYFF rokbai teibo saimanani bagwi DBGYFF ni websaito (website) habwi saimanwimanu. (www.dbgyff.com) 

Don Bosco Global Youth Film Festivalni obo wainwi sijon (season), taklai ni kokbothoma eba thim (Theme) wngkha Hamjakmano tongkwchang tei Khathansa swnamo eba 'Love Builds Peace and Solidarity'. O Film Festivalo kisa Juda eba 'Unique Short Film' rokno lukurokni bwskango phunukjaknani bagwi chongwi naharjakha. 

Sikla-sikli rokno teibo Film swnamao, Film swrwngnani'o tei Film ni haparo teibo gwdalrwnani bagwi Film Festivalo habnani eba Entry nanani bo magwnangno khlaijakha. Phiyaba aro bo haino hai nugjakha, Tripura ni sikla-sikli rok obo hai seb kahamno khabai lamsokrakliay, belai borok kisa no nukjakha O Film Festivalo, aboni bagwi belai khakhamu hwnwi sakha O panda luwajijanairok. 

East Twipra bai koksaui Father Joseph Pulinthanath, DBGYFF Agartala Edition ni khoroksa chariphang sakha, "O Film festival, hayung gwnangwi sikla-siklirokno bórok ni huijak suar phunuknani kaisa seb rwjakmase, tabuk ni tongjorani kokrokno twywi bórok ni naharmung bwtwi abono Film ni yangtwi luku rokni bwskango phunuknani kaisa jora kaham bo hwnwi manu, phiya Tripura ni wngwi kaisa phano O Film Festivalo film rohorjakyani bagwi belai khakhamna kok" hwnwi bo saikhnarwkha. "O Film Festivalo Film rohorkha hwnkhe hayung gwnangwi kai 136 haktorni borokrok Tripura ni tóke ni bagwi bo tabuk kok salai tonglai khamu" hwnwi bo sakha.

(From left) 1) Don Bosco School Agartalani Principal, 2) (back) Fr. Joseph Pulinthanath, 3) DBGYFF Director Fr. George.

Don Bosco Global Youth Film Festival, Don Bosco School, Agartalao phungni damchisa tamwi soti thamchi'o (11:30am) Don Bosco School ni Principal, DBGYFF Agartala Editioni Director, tei Father Joseph Pulinthanath ni yakbai chati sógwi O panda chengwirwjakha, diporni damsa tamwi soti nwichiba'o (1:25pm) Intermission wngwi manjakphairokni bagwi chamung yapharjakha, tei sarikni dambrwi tamwi soti brwichiba'o (4:45pm) panda mwthakjakha.

Father Joseph Pulinthanath, dangsa'o kok narak phuru tabukni sikla-sikli rokni gwdalmung rokni bagwi bo saikhnarwkha "Social Media rogo tabuk belaino kwlwkjak chini siklarok, phiya 'Art' swrwngmao bo bwkharwkha hwnkhe belai kuchugo bo ka'ui manu chini siklarok" hwnwi sakha. 

Paithago East Twipra bai koklam narak phuru bo hwnwi sakha, taklai wngwi manu aswk borok bangliya phiya O festival bisi brum-brum no luwajijanai bwskangni bisi rogo tei kisa borok rokni bwkhao muchungma phayanw hwnwi khakayu hwnwi bo sakha.

O Global Youth Film Festivalo Albania, Argentina, Brazil, Chile, Colombia, Cambodia, El Salvador, Equador, France, India, Italy, Kenya, Madagascar, Malawi, Mexico, Nigeria, Poland, Portugal, Slovania, Spain, Thailand, Togo, tei Vietnam ni kaibachinwi (52) film batailaikha, kwplai wngnai film no €1,000 Euro eba khok 87 rasai (lakh) sokat rwjaknai. Phainai bisi rog chini haste wngwi bo Film rok hayung gwnangwi phunukjaganw hwnwi Film Festival luwajijanairok khakhaimung phunukha.