TIPRA Motha ni lukuthum panda'o Conrad Sangma phaima bai tamo koktun sogwikha Northeast gwnangwi?

 

TIPRA Mothani kotor lukuthum panda'o manjakphaikha Meghalayani Montri Okra Conrad Kongkal Sangma

Chasalo, TTAADC ni headquarter Khumulwngni Syndicate'o TIPRA Mothani kotor lukuthum panda luwajijakha. Haste ni jottoni slai kotor kebengnai bodol TIPRA Mothani O Kotor lukuthum panda'o Meghalayani Montri Okra Conrad Kongkal Sangma naruwai okra wngwi manjakphaikha.

Lukurokni bwskango kok narak phuru Meghalayani Montri Okra Conrad Sangma hai hwnwi sakha "Northeastni hani bwsarokno tomungno kebo sak nangya wngwi tongkhe eba bórokno manthai rok rwjakya wngwi tongo hwnkhe aboni bagwi bachana nangnai jotto Northeastni hani bwsarok, abo haikheno Meghalaya ni wngwi bo jotto dophani wngwi chwng bachanai, Tripura hasteo bo oroni hani bwsarok satokjagwi tongmani bai chwng bórokni logi'o bachao bórokbai baksa khorang tisao, O koknono tini sa'ui khna rwkha Meghalaya hasteni Montri Okra.

Bó teibo sakha "tomungno hani bwsarok satokjagwi tongmano haktor Haphang saknangya wngwi tongkha hwnkhe siring-siringkhe tongwlak Northeast" hwnwi sakha, "tei aboni bagwi jottono ongkhorwi choba khwlainai" hwnwi khorang kotor bai kok sakhlaikha Meghalaya hasteni Montri Okra Conrad Kongkal Sangma.

Bubagra Pradyot Kishore Debbarma bai Meghalaya ni Montri Okra Conrad Kongkal Sangma.

Sangma teibo sakha "chwng kebono kebengna thangya, juda bosongo rokno naslerna bo thangya, chwng jotto bai thansakhe tongwi, hamkrai wngthung hwnwi simi se nayu.

Chini hukumu chini tongraidano tei chini bwkhakni thinangni sikla tei bwrwino mwthangwi narwkna bagwi mungsa swk O hani bwsarokni saka hamya wngkhe chwng siring-siring tongwlak. Haini bagwino jotto hani bwsarokni tabukno thansa wnglainani jora, chini pherlaima rokno halchalkhe tonilaywi, chini thinangni bagwi chwng thansa wngthai" hwnwi.

Bubagrabo O kokno teibo khursai sakha, "Thansa ni bagwi ringjakmani abo Tiprasarokni thansani bagwi simi sajakya, Northeast bwkhakni jotto hani bwsarokni thansa bagwi bo sajago, thansa wngkhe simise chwng chini khorangno Delhi jora sókrwui mannai" hwnwi sakha.

O Lukuthum panda'o TIPRA Mothani tẃiphang Bg. Bijoy Kumar Hrangkhawl, ADC haphangni CEM Bg. Purna Chandra Jamatia, ADC ni achukphang Bg. Jagadish Debbarma, kebengnai bodolni ojama Mg. Animesh Debbarma, kwcham montri Mevar Kr. Jamatia no khobwi TMP ni EM, MDC tei MLA rokbo manjakphaikha.

O kotor lukuthum pandani bisingtwi kaisa koknono waikwbang sajakha abonkhe Northeastni hani bwsarokni thansa ni kok, phiya bórokni O chaitokmung thinango bwswk bwthai ba rwno? Aboni bagwi jora simi saui mannai. Haiphano obo bai Northeast gwnangwino thansani boyar sibsanani chengwirwjakha hwnwi bo kwbangma lukurok khakhlailayu, bwskangni salo teibo Northeast gwnangni borok kotor-kotorok kuthumlaywi koksalaimani koktwma mankhe abo mungsa wanani kok wngwlak.