TIPRA Mothani buma bodol TWF Manikya Courto salnwini bagwi 'Tiprasa Food Festival' luwajikha.

 

TWF bai Luwajijak Tiprasa Food Festival, 15-18 October, 2023
Photo by Bijayan Tripura, Correspondent

Koktisal 15 Octobero, TIPRA Mothani buma bodol TIPRA Women Federation (TWF) bai Nuyungma ganani Manikya Courto Tiprasa Food Festival luwajikha. Puila O ter salnwini bagwi chongjak tongmani phiya abono tei salnwini bagwi phologwi rwjakha. Tabuk O Food Festival 15 Octoberni simi 18 October jora wngna thangwi tongu.

O terno Bubagra Pradyot Kishore Debbarma bini sakbaithang bini yakbai phiyogwirwkha. O chamung ter eba Food Festivalo kwbangma dalbi-dal Tiprasa chamungrokno nugjakha.

Puila O terno Astabal thwngnokhla eba Swami Vivekananda Studiumo khlaijaknani tongmani phiya Astabal thwngnokhlano manya wngma bai Manikya Courto makhailaikha hwnwi buma bodolni adongrok sakha. Manikya Court chikon wngma bai aswk kwbangma Stall eba phalkhotol swnamwi manliya. Kaichinwi khotol simi se swnamwi mansio hwnwi khoroksa buma bodolni adong sakha.

O Food Festivalo chamungni compitition bo khlaijaknai, bebak khotolni chamung cha'ui naywi 'First', 'Second' tei 'Third' ni sokat bo yapharjaknai.

O Food Festivalni naharmung Tiprasa chámungrokno mwthangwi narwknani uansukmungbai luwajijakha, haini bagwino oroni bebak chamungrok thapa'o bolni hor bai songjak mangno kwbangkuk hwnwi ter luwajinairok sakha. Tei oro wasungbai songjak muirokbo nugjakha.

Sarikni pandano teibo mwchangrwnani bagwi Jadu Kolija rwchapmung bo rwchapjakma nugjakha O tero.