#Exclusive Interview Bg. Sajal Debbarma, UTF Senior Advisor

Exclusive Bg. Sajal Debbarma, UTF Senior Advisor, bai East Twipra ni Exclusive interviewo UTF ni achaiphang tei borogni Dopha hamkwraini samungrog ni lam no rwgwi koklam swlaikha.

UTF bodol khayaui puila samung khaimani bising twise sochajakmani -

Bg. Sajal Debbarma, UTF ni achaimano jorani kaisa nangkukma bai se chengsajakmani hwnwi sawo, 2017 ni "Tipraland Choba" no twywi IPFT bai Road blockade khlaijakmani bisingo kaisa Whatsapp group ni twi Tripurani sinai-nuknai sebok kotor khainai rok Choba no chubanani yapri kaisa namatwi se chengsajakmani, aphuru UTF ni kunu yarwng-yaphang phano kwrwi khu. Ayang twi no "Tipraland Choba" no chuba laywi tongmani, hwnkhe arono O groupno twywi kaisa NGO swnam lainani kok bo kasakha, phiya aphuru group ni bisingo no kwbang mo hai uansukmungno chajakya bo wngkha. Haikhe September tal hapte hapte wo kaisa chubanani samung khainani seb phaikha, Jalien Kaipeng ni mung twi. Bg. Sajal Debbarma sawo UTF ni achaimung Jalien Kaipeng ni samung twi no chengjakmani hwnwi.

Bg. Sajal Debbarma, UTF Senior Advisor

Jalien Kaipeng khoroksa cancer kulum, bo Retinoblastoma ni ruk manwi belai tekto wo tongmani, haikhe groupo kok salaimung chengkha, bono chubalainani no twywi. Bg. Sajal sawo, aphuru bo tei tai khoroksa, Chini Khorang News Channel no twlangwi, Jalien Kaipeng ni kami Twidu wo thangwi sogwikha. Aro sogwywi borog mwktwi narwk manlailiya Jalien Kaipeng ni gwrwng no nugwi. Jalien Kaipeng ni nog baksa borok rokni Pun tonma nogni saiphano hamkukya, hwnwi Bo sakha. Aro thangwi naywi mani yagulo borog Jalien Kaipeng no twywi Public Donation thumnani chengkha. Phiya aphuru rogo bo NGO ni kunu mwkhang kaham khe khaimanya khu borog ni group no, tei kunu account rogbo kwrwi wngma bai aro tongnai borok rogno bank account baklaywi Donation rwnani ni lam bo chengjakha. Aphuru ni simi no NGO swnamnani koktisama bo teisa ha kwrak manani chengkha, hwnkhe mung bo kaisa nangwi tongmani bagwi kwbangma mung rok bo swlaijakha, paithago "United Tiprasa Forum" hwnwi mung gosinaharjakha.

Bg. Sajal Debbarma, juda NGO rokni achaima bai UTF ni achaimani no su'ui sakha, "Juda NGO rokhe puila bodol se khajagu aboni ulo se samung khwlaijagu, phiya UTF ni khe puila samung tangjakmani bising twise bodol ni mung rok kahamkhe songchajagu" hwnwi.

Bo teibo sana thangkha, "Jalien Kaipeng ni simi O NGO songchajakmani ulo swrapsa ni bagwi phano borogni samung thagwi tongliya" hwnwi.

Lam Phunuknai Trust UTF ni kaisa tactical yapri -

Bg. Sajal Debbarma no Lam Phunuknai Trust ni twi kisa sawui khna rwdi hwnwi swngjak phuru bo sawo, UTF chengsajakmani taltham talbwrwi ni bisingo no Whatsapp group ni kok swlaijakmani screenshots rog bo pirsajaknani chengkha, aphuru ni Ruling party ni kainwi koktwma saroknai rogni koktwma bwlayo borogni WhatsApp group ni screenshot rokni koksalaimano twywi UTF no anti national ni mung bo silsai rwkha borogni koktwma bwlaini kaisa koksobo. Aphuru no kwbangma group ni members rok WhatsApp group yakarna chengkha, haikhe paithago khorok nwichinwi(22) borok baise UTF no ku kubui khe chengsajakmani. Aboni ulo mung swlai lainani kokrok bo kasakha, haiphano aphuru rogo lukurogni khugo bo UTF ni mung dopha hamkraini samung rogno tangnai haikhe Kasai thangma bai UTF mung no bo karnani kaham lama hai nugliya, phiya o mung sitra no musuna bagwi se Lam Phunuknai Trust ni mungwi bebak daptor ni samung ayang twi khwlaijakna chengo. Hwnkhe UTF no Lam Phunuknai Trust ni kaisa bedek haikhe swnam rwjakha, hwnwi bo sakha.

Bg. Sajal Debbarma UTF ni samung khaima rokno tei juda NGO rok bai kwrakhe su'ui sawo, "UTF songchajakmani buino solya hai, samung khaima bo buino solya, juda NGO rok khe bisio waisa wainwi jora mwchang laikhe se samung khayu, phiya UTF ni samung salni Dam nwichibrwi (24), bisini salthamradokchiba (365) jora samungo kwrwngjak" hwnwi.

Free coaching ni yang twi thinang ni elem rokno swnamani -

UTF ni yang twi charity panda khwlaimano karwi tei kaisa belaikhe sinijak samungo wngkha Tiprasa rwngswrwngnai rokni bagwi kuchuk beremni kotor amjokmungo amjoknani bagwi Free Coaching rwjakma. Mg. Sajal Debbarma O chaitokmung borogni puila twiphang Budhiliam Hrangkhawl ni yang twino chengjagu hwnwi sawo. Bo teibo sakha, "Budhiliam Hrangkhawl UTF songchajaknani swkangno, dopha hamkrai ni samungno yago tisaui nama tongu, bo agi phuru bo Tiprasa rwngswrwngnai rokno Free Coaching rwino phai tongmani, abo aswk kotor wngya phano, haikhe UTF songchajakmani ulo bini O samungno teibo kotorkhe tangjakmani chaitokmung naharlaikha, Puila khorokba khorokchi bai chengjakmani tabuk khorokthamra (300) rwngswrwngnai rok hai wngkha". Tabuk UTF ni Free Coachingo talchinwi (12) ni bagwi coarse naitongnai ni bising kwbangkuk no TPS, TCS, TPSC combine amjokmung rwnai rok tongu, abono karwi Online coaching ni khobwi 300 rwngswrwngnai ton-tongu. UTF ni direct sponsor manjak khoroknwi rwngswrwngnai rok bo tongu, borog tabuk TPS TCS rwna bagwi School of Science-o Coaching nahar tongu. Tei 5 lakh bisibrum-brum ni budgeto Delhi ni Vajirao wo IAS IPS ni bagwi bo khoroksa candidate UTF ni chubamung bai Coaching nai tongu.

Dyson Tripura belai kwpal hamya -

Dyson Tripura bini Retinoblastoma ni beram bai 

Bg. Sajal Debbarma no Dyson Tripura no twywi swngjak phuru, belaikheno kwpal hamya Dyson hwnwi sakha.

Hoku twisa kami ni Dyson Tripura bo Jalien Kaipeng hai Retinoblastoma manjagwi belai tekto wo kwlai tongmani, nukhungni borok rog chukya wngma bagwi sakham nog rogo bo kahamkhe phunuk manlaiya wng tongma jora haste ni kwbangma chubanai bodol no chubana hwnwi agugwi phaikha, haikhe puila TIPRA Motha yag twise naikol jagwi tongmani Dyson Tripura, phiya belai samung jwngjal ni bagwi paithago yakarwi ma rwjakha, aboni ulo UTF ni yago o koktwma phaima yagulo borog Dyson ni case no naikolnani barja naharlaikha. Haikhe public Donation khagwi, bini diagnose rok naharwi bono Guwahati sakham nogo rohorjakha. Phiya aphuru phano daktor rok bono mwthangmani lama belai keseb hwnwi no tongmani, haiphano bini mokol no Operation khaywi kisa kechep rwkha. Bg. Sajal Debbarma sawo, aphuru bo borog Dyson no mwthangmanani lama belai keseb hwnwi saimanwi bo kaisa uanamasingsa rok de wngno hwnwi borog khakai tongmani, haiphano jora bo aswkhe gothokliya Dyson ni bagwi, je nangmani amjokmung rok tei Chemotherapy rok jora bai baksa manwi manliya ni bagwi, langma chona nangkha.

Bg. Sajal Debbarma teibo sana thangkha, "Dyson Tripura ni hai kwbangma case rogno phayu UTF ni oro, kwbang kuk rogno no chubalainani chaitogu, phiya kaisa kusu tongo abo chwng bo chubai manya rok wngwi thango, haiphano borog no je mansak kahamkhe nangmani guidance rok rwi rohoru". Bg. Sajal Debbarma borok ni jottoni sai rang thangnai case rogno muitu khaywi saphuru Lakhi Tripura, Donika Tripura, Kafrin Riang akosongni bagwi sakha. Bo teibo khursai sakha, jottoni sai rang thangkuk nai kulum rogni bising wngkha Donikha Tripura, bini sakao nwichisa (21) lakh rang thangkha chibrwi tal romwi bini sak naimani bai.

UTF Bangladeshni Tiprasa rokni bagwi bo thinango samung khainai -

Bg. Sajal Debbarma no UTF ni thinang bahai, UTF haste ni phataro tong tongnai Tiprasa rokni bagwi bo de uansugwi tong hwnwi swngjak phuru, bo sawo tabuk phano Bangladesho tong tongnai Tiprasa rok bono call rok khayu hwnwi, borog ni aro bo phaywi naiphaidi hwnwi, Borog bo chini samung rokno facebook rok twi nukhe belai khatungjagu, kwbangma borok rogno chubanani bo muchungo, aboni bagwi next AGMo Bangladesh ni Tiprasa rokni bagwi bo uansukjaknai hwnwi bo sakha.

Opinion: UTF tabuk phano thuya dopha hamkraini bagwi salni dam nwichibrwi (24) romwi samung khaywi no tongo. Tabuk Siyari Tripura no chubana bagwi nokhorjak bini bagwi Donation thumlaimao khok nwichidoksai(26,000) ni sai kwbangkuk no mankha, tabuk naina simi kwlayo, Siyari Tripura ni langma bo de UTF ni yang twi mwthangjakno?