 |
| Pic - Holong Siki Mwtai, Designed by Abel Debbarma |
Bisi brum-brum no 'Shiv Ratri' no rwgwi Holong Siki Mwtayo salnwi ni bagwi ter khwlai jago. Amchai ni tei Haste gwnangwi borok rog O ter no naina bagwi, tei Holong Siki Mwtai no khulumna bagwi phailayo. Taklai khe February ni 19 tei 20 salmario o ter wngwi tongo.
Holong Siki Mwtai, Mandwi amchaini Madhab Kami gana o kaisa Mwtai nok, bisi brum-brum no salnwi ni bagwi aro ter khwlaijagwi phaitongu.
Taklai bo abo haikheno hodom-dodom bai khe ter palaijagwi tongu. Haste gwnangwi borok rok oro Holong Siki Mwtai no khulunani tei Boli rwphaina bagwi kuthum laiyu.
Ter ni Secretary Mg. Sanjit Debbarma bai koklam salai phru saimankha, 'Shiv Ratri' no rwgwi no O ter bo songchajagu hwnwi, 'Holong Siki Mwtai wngkha Ma Kali ni kaisa goron se' hwnwi bo sakha, 'Shiv no Shiv Ratri phru maicharwlaima hai chwng bini bihik no bo maicharwlayo tini' hwnwi bo sakha. Taklai puila salo khorok bwswk rok phai khna hwnwi swngjak phru bo sakha '2500 ni simi 3000 borok rok phaikhna hwnwi", Tamo tamo rok boli rwphaijak oro hwnwi swngjakmani bo sakha 'Baksa ba Tok boli rwphayo, baksa ba pun rwphayo, baksa Pharuk phiyokna bagwi bo phayo, tei pun tok bo phiyok phayo' hwnwi.
.
.
@easttwipra.in no follow khaidi Kokborok bai Hayung gwnangni koktwma manna bagwi.
Support East Twipra Support Kokborok Journalism by Donating to our small efforts with the QR code provided in the post or through this UPI ID : swngchar11@oksbi
