Haktor gwnangwi Khristan rokni saka khwlaijak tongma satok-pitok no sejaui, 'Khristan rok Jantar Mantaro kuthum laikha'

Khristan rok February 19 no Jantar Mantaro Borogni saka khwlaijagwi tongma satok-pitok rokno twywi kuthum laimani | PTI

February 19 Koktisalo, rasa(100) ni sai saka nokthar(Church) tei Haktor gwnangwi khristan rokni bodol rok miliui thansa khe O lukuthum panda o manjak phaikha.

"Chwngno lama hamya twi borok rogno baptisma  narwmani koksilchajago" hwnwi sakha Steven, Uttar Pradesho tongnai khoroksa borok. "Nokthar (Church) rok choprobjak tongu, khristan rok bujagwi tongu tei romjagwi tongu. "Chini borok belai kirimachajak tabuk" hnwi sakha Steven.

Pic - Adv. KhushbooSal/ Twitter 

Sal sni swkang no Madhya Pradesh ni Narmadapuram hangkhor ni khungsa girja nog soksajak rwma ni yagulo Jantar Mantaro khristan rok kuthumlaikha

Aboni swkang bo January 2 salmario Chhattisgarh ni Narayanpur hangkhorni tei khungsa girja nog swbaijakmani tei naimwthang bedek ni borok rogno choprobmani patimungo, BJP ni khoroksa adong bai baksa khorokba borok rog romjak paimani.

Pic - Adv. Khushboo/ Twitter

December talo kaisa Saklaimung bwlai khristan Institute tei Bishop khoroksa ni bagwi tikhlaijakmani, aro borogno kaisa raida ni phataro baptisma rwmani no bujok rwdi hwnjakha Uttar Pradesh ni Fatehpur hangkhoro. Obo Vishwa Hindu Parishad ni khoroksa adong bai koksilchamung no twywi rwjakma.

Koktisalo, President Droupadi Murmu no kaisa koimung bwlai rwnai hwnwi sakha Jantar Mantaro khuthumnai khristan rok, Retired Supreme Court Judge ni naikolmungo khristan rokni saka "targeted Violence" wngmani kok tisa na bagwi National Redressal Commission khaui rwdi hwnwi koinai, saka borog.

A koimung bwlayo khristan rok Uttar Pradesh haste, Chhattisgarh haste, Madhya Pradesh haste, Uttrakhand haste, Karnataka haste tei Jharkhand haste rokno bwlai kaham naichomthai hwnwi sajakha.

United Christian Forum kaisa Delhi ni Human rights bodol, uhamso kainwichisa(21) haste o rabachukuchichar(598) Khristan rokni saka wngmani butokmung ni patimung tisakha hwnwi sakha.

.

.

@easttwipra.in no follow khaidi Kokborok bai Hayung gwnangni koktwma manna bagwi.

Support East Twipra Support Kokborok Journalism by Donating to our small efforts with the QR code provided in the post or through this UPI ID : swngchar11@oksbi