Twiprani sajwk Tarubala Debbarma, President ni yaktwi Sangeet Natak Akademi Award mankha.

Bgj. Droupadi Murmuni yaktwi Sangeet Natak Akademi ni sokat yachakjak Bgj. Tarubala Debbarma. Pic - Tarubala Debbarma/ Facebook

Tripura Hasteni sajwk Tarubala Debbarma 23 February tal 2023 bisio Delhini Vigyan Bhawano Sangeet Natak Academi Award yachakha Bharat Haktorni President Bgj. Droupadi Murmuni yaktwi.

Award yapharma pandao phai manjakha Bgj. Droupadi Murmu Boromgwnang India ni President; Bg. Gangapuram Kishan Reddy, Minister of Culture and Tourism & DoNER; BJ Arjun Ram Meghwal, Minister of State for parliamentary Affairs & Culture tei Dr. Sandhya Purecha chairman Sangeet Natok Academi.

2019, 2020, 2021 ni bagwi Sokat mannai rok. Pic - @sangeetnatak/Twitter

Sokat yapharma pandao 2019, 2020 tei 2021 bisini juda juda babai rwchapmung(folk song), mwsamung(folk dance), Thwngnuk(drama), tei Toke(film) rogbai gwdalwi tongnai athukiri rogno sokat yapharjakha.

Sangeet Natak  Academi wngkha haktorni "Art" rogbai kwrwngwi tongnai lukurogni bagwi swnamjak kaisa motha, mo motha  songchajakha 1953 bisio chini rwchapmung, mwsamung tei Thwngnukrogni bisingtwi Hukumu mukumu khatinani tei phuwarnani bagwi songchajago.

2020 ni Sokat mannai rok. Pic -@sangeetnatak/Twitter

Mo kok khurchathai kwlaio jora kwdwkma romwi Bgj. Torubala Debbarma jadu kolija rwchapmung mwsamungrog bai bini rwngswrwngwi tongphru ni jorani simino kwrwngjak. Tabukbo Tripura hateo Jadukolija rwchapmung kwrwng hinui sinijagwi tongo. Bo tabuk khoroksa rwngnogo(school) o phwrwngnaijwk okra(headmaster) ni sebok khwlai tongo. Bo   Haphang ni sebok khwlaima bisingtwi bini rwngnokni swrwngnai tei swrwngnaijwk songno jadukolija rwchapmung, Mamita, Goria mwsamungrog bo phwrwngo. Hateni kwrwng kwrwng thaio rwchapmung mwsamung khwlaina bagwi kwcharmung mankhe bini swrwngnai(student) rogno twlangwi dangsao(stage) phunug rwyo tei moni bisingtwi Tiprasa Dophani Hukumu Mukumu Hayungni lukurogo phunugo.

Delhi haktorni Vigyan Bhawan bachayui Hasteni lukurogno kok kwcharkha Bgj. Tarubala Debbarma, " O sokat Ani bagwi simiya obo chini Tripura Hasteni lukurogni bagwi chini sinimung chini Jadu kolija, mwsamung(Folk music and dance) obo chini jotoni sinimung chuchu bora rachi chini thinangni jotoni bagwi yapharo" hinui kok kwcharkha.