Khwna 27 February 2023 salmario Nagaland bai Meghalaya haste rogni chongmari wngna thangwi tongu. O chongmari ni bisingtwi no A hasteni luku rog phainai bisiba(5) ni bagwi kwcham mwkhang rogno de chongphino eba kwtal mwkhang rokno de seb rwno, abo naithai kwlayo. Juda juda haste ni no sak sakni kwbangma kokno twywi o chongmari o nongkhorkha, baksa ba sinimung no twywi, baksa hano twywi, baksa luku hamkrai nayo, baksa jotto babai twi no hamkrai nayo, baksa ba tongkwchang nayo, tei baksa ba juda juda manthai ni sanmung rok tisa laywi, o chongmari o borog ni chongmung rwna thangwi tongu. Phiya oro jottoni sai kok salaijakma sanmung rokni bising wngkha "Frontier Nagaland" ni Haste wngnani sanmung.
Frontier Nagaland Tamo?
Frontier Nagaland ni sanmungno Eastern Nagaland Peoples Organisation (ENPO) 2010 bisi ni simi romwi tisaui phaimani. O sanmungo Nagaland ni salka babai phasingni kaidok(6) hangkhor khobjagu, abo rok wngkha Tuensang, Mon, Longleng, Kiphire, Noklak tei Shamator, O hangkhoro kaisni dopha tongu, abo rok wngkha Konyak, Khiamniungan, Chang, Sangtam, Tikhir, Phom tei Yimkhiung. Tei haste ni kaidokchi(60) "Assembly" achukthai ni bisingo o kaidok hangkhoro kainwichi(20) achukthai tongu.
O sanmungno twywi thanai bisi 2022 ni August talo Salka babai ni borok rog phainai 27 February 2023 ni chongmari o batailaya hwnwi sakhlai mabai haste tei Haktor gwnangwi o sanmung ni twywi luku rok teibo saimanna chengkha.
Phiya tangwi O sanmung kasakha borok rok swngwi manu - O haste kwtal ni sanmung kasamani yaphang - tei juda Nagaland ni hangkhor rokni sai aswk kahamkhe naikoljakya ni bagwi bo hwnwi manu. Salkabai ni luku rokni abono koksilchamung, hamkwrai ni samung rok borogni yang phasing aswk sokphailiya eba rohorjakliya, sak nangjakya khwlaijakma bo nugjakha hwnwi luku rok koksilchakha.
Aboni bagwi no kwtal haste wngkhai luku rok teisa tisajaganw tei hamkwrai bo wnganw hwnwi salkabai luku rokni khakamung.
O sanmungni twywi teibo hor phwnangkha Amit Shah, jephuru bo salkabai Nagaland no chongmari no twi lukuthum pandao thango.
21 February 2023 salmario Haktorni Home minister Bg. Amit Shah Nagaland Assembly chongmari paimani yagulo "Eastern Nagaland" sanmungno supungwi rwnani kokrwkha. Bo aboni bagwi lukurogno BJP bai NDPP no kwbang vote rwnani koikha.
Bg. Amit Shah Nagaland ni Tuensang Hangkhoro lukuthum pandao koknarwkphuru bo o kok sakha "Chwng chongmari paimani yagulo Eastern Nagaland sanmungno supungwi rwnai" hinwi.
O kok khurchathai kwlaio Eastern Nagaland no ukolok tonio tei hasteni hamkwrai (development) no naharwi bugrasamung(administration) tei thwngrwng(political) no jai khaijakya abagwi Nepo rok koksilchakha alaida haste nango hinui.
Bg. Amit Shah teibo kha khulokgwi sakha Pradhan Mantri Gramin Awas Yojana ni bisingtwi 55,000 hai lukurogni nukhungo Nok rwjakha hinui. Bo teibo Sakha 2015 ni simi mo no puila PM( Montri Bokhorok) Bg. Modi 50 (bachi) ni saikwbang Salkabai (North East) haao yapri rwnai hinui.
Tabuk chwng obono naithai kwlaio, Salkabai Nagaland no tongwi tongnai luku rokni kwtal haste 'Frontier Nagaland' swnamnani sanmung Haktor hapang bai bwswk jora twi supungjakno, tei kubui de kwtal haste ni samungo yapri sejakno, eba haste no karwi hamkrai ni lama twi de salkabai hangkhor rokni luku rokni sanmung supungjakno, abo bo naithai.
Phiya kok le rwjakha, abono twywi samung chengnani, luku rokni biyal tekto bwswk ba bujikha hapang achuk tongnai rok, tei kubui de poito chakha luku rok hapango achuk tongnai rokni kokno? Abo saimanna khe March talni nwi sal jora nasing ma tonglainai.
.
.
@easttwipra.in no follow khaidi Hayung gwnangni koktwma teibo swrai swrai khe saimana bagwi.
#easttwipra #nagaland #meghalaya #election2023
Tags
Chongmari