12 February ni sarigo Madhab bari o kotor luku thum panda o Bubagra Pradyot Kishore Debbarma kokkwchar phuru BJP rokno lukurokbai Thokai khayu hwnwi kok silchakha.
Kwbangma kok koto koto rwui yangkhe samung mungsa phano khaima kwrwi, luku rokno 'Cholo Paltai' hwnwi thumui paithago lukurogno Thokai kha BJP, hwnwi sakha Bubagra Pradyot Kishore Debbarma.
Kisa sal swkang Tripura o Mithun Chakraborty phaimani no twywi bo sakha Bubagra, "Mithun samung-humung rokni bagwi khe mungsa saya, phiya sak-sakno 'Ami Cobra' hwnwi simi sao".
Kwbangma koksilchamung rokni twywi bo kokphirokkha Bubagra, Communal hwnjakma kokno phirogwi Bubagra hai hwnwi sakha, "Ang waisa phano wanjwi bosong ni borokrokno nasleya khu tei borogni bagwi mungsa hamya rokbo sayakhu, phiya agi phru wanjwi bosong rogno swrainai khe tabuk BJP ni Vice President wngjak, lukurogno saiman sinai abo".
Bo Bru Bosong ni borok rokbai borogno tonjakma camp rogo malaywi mani kok Bo sakha, "Taltham romwi chini Bru Dopha ni borok rok Ration manya, aroni Officer no swngwi mani se sajago, Bru bosongni borok eba Tiprasa rokno chamung ta rwdi hwnwi dagimung manjak, obo rokno khnaui ang sana muchungo TIPRA MOTHA hapango phai phru A Officer no bo Taltham mungsa rwya aphuru se bo swimanai tekto tamni hin".
Himanta Biswa Sarma samani haste no khakrwya hwnwi abono twywi bo kokphirokkha Bubagra, bo sakha "Chini manthai chwngno norok rwkhakhe chwngbo sanna nanglakhamu" hwnwi. Tei tabuk phano kok salainao nasing tongkhu hwnwi sakha Bubagra.
Tags
Chongmari