Bwskangni chongbari bataina bagwi dalbidal bodolni wngwi chongbari batai nai rogni manifesto. BJP, CPI(M), Congress, TMC, TIPRA Motha Party(TMP)
Phainai Bidhan sabha chongmarini bagwi dalbidal bodol ni manifesto no mokol kwlaithothok. Haphango achukhe lukurog bwswk bwswk sepsap mano lukurogni bwswk jora twi hamkwrai wngno? Manifesto rwjak koktwide samung khwlaijak no? Swngmung lukurogni.
TIPRA MOTHA PARTY:
 |
| TIPRA Motha Party Manifesto Release |
4 February ni sarigo press meet khaywi TIPRA motha saklaikha party ni Manifesto.
Manifesto wo kaichiba(15) samungno puila Salrasabachi(150) ni bisingo khwlaywi phunuknai hwnwi sakha Bubagra. TTAADC no teibo phanrwnani kok rwkha, bini budget bangrwnani, tei bebak bathakjak sanmungrokno supungnani kokrok bw sajakha.
TIPRA Motha Party(TMP) ni kubui naharmung Greater Tipraland no tongnai hwnwi swrai swrai khe borogni manifesto O swijak tongu. Phiya abono karwi bo borog kwbangma samung rogno bo tangnani kokrwkha. Aro salaijakmani jottoni sai swkang nugjakmani hwnkhe, Salrasabachi ni bising kaichiba samung khwlai phunuk na hwnwi samani, aro ADC no teibo Phan rwnani, budget allocation, Land Patta rwnani, 20000 kwtal sebuk saroknani kainwi public tei private sector ni bisingono, Haste o World Class rwngswrwngmung ni nok tei dalbibal University rok khuluknani, Village Committee Election khwlai rwnani, rwngswrwng tongnai rokni magwnang rang bai chubachu rwnani, Dam Nwichibrwi(24) ni bagwi Sakham naikoljaknai seb rwnani, drug rokni yakni yokna bagwi kami brum-brum bwrwi rokni bodol khanani, Doglam-Doglam delivery service hapang ni scheme tei service rokno rwnabagwi, jotto kaichi(10) bathakjak samung rogno bebak MLA rokni amchaini supungnani tei Hasteno CAA ni phiyoknani resolution tubunani.
Obono karwi bo, Rwngswrwngmung (Education), Jobs, Employment tei Start Ups, Sakham (Health), Chuwaimung (Agriculture), Bwrwi rokni tei Chwrai rokni hamkwrai, Sikla rokni hamkwrai, Infrastructural Development, Industries, Tourism, Law tei Order, Social Welfare, Kami amchai tei tongkosong rokni tongkhor rokni Development, Okra Chakra rokni hamkwrai, Hukumu, Thwngmung, Kaham naikolhapang (Good Governance) tei Administrative Swlaimung(Reforms), Bangthaya borok rokni Development, Auli rokni Development, Media tei International Ari(Boundaries) rokno twi, Bru rokni tongthai rwnani no twywi, akorogni bagwi samung tangnani hwnwi TIPRA Motha Party (TMP) saklaikha.
Bharatiya Janata Party:
 |
| JP Nadda at BJP Tripura Manifesto Release |
Chongmarini no naharwi BJP party ni star campaigner rok hasteo sal-hor yapri barokma thaklia Miya chasalo haste montri bokhorok PM Narendra Modi Bo hasteni kwrwng nwi thai Udaipur tei Ambassa o phai sokphaikha, hasteni lukurogno tong kwchang chakwchang, luku hamkwrai tei kerong raida kaham khwlaina bagwi BJP o vote rwnani lukurong no koikha.
Laithangnai Salmari 10 Feb 2023 o BJP party ni wngwi manifesto blai eba Sankalp Patra borog ni khuk twi karijakha Rabindra Satabarshiki Bhavano A pandao phaimanjakha BJP haktor ni achukphang okra J.P Nadda, CM Dr. Manik Saha, Deputy CM Jishnu Debbarman, BJP haste achukphang Rajib Bhattacharjee, tei khoroktham MP borogno karwibo teibo manjak phaikha haste ni Prabhari Mahesh Sharma, Dr. Sambit Patra akosong.
O Manifesto haste ni tongkosong lukurog ni bagwi tamo sajakha hwnwi cherwi naikhe nugo, TTAADC no Greater Autonomy rwnani kok 125th Amendment Bill ni bising twi, Councilo jora bai gwdalwi Budget allocation borok bangmani no naywi, Kokborok bai gwdaljak jotto salaimungo Council no bo logi toninai, Tripura Janjati Bikash Yojana ni yang twi bisi o waisa Financial Chubachu ₹5000 rwjaknani, jotto block brum-brum Eklavya Residential School khulukjaknai, tei jotto Dopha ni Hoda okra tei Rai songno rwjakmani honorarium ₹2,000 ni simi bangrwui ₹5,000 khairwjakha. Tongkosong lukurog ni hamkwrai no karwi bo, Bwrwirok ni hamkwrai ni bagwi Balika Somriddhi Scheme chengwi rwjaknai aboni bising twi₹ 50,000 rangmari rwjak chuk thaya nukhung ni borok rogno, nogo bwrwi chwrai achaikha khe. Kaham mari bai Kuchukrwngnogo(College) swrwng tongnai bwrwi rokni bagwi Scoty rwnani bo saklaimung khaijakha. Tongkosong lukurogni tei bwrwi rokni hamkwrai no karwi bo, Chuwai Chanai(Farmers), Sikla rokni hamkwrai ni bagwi bo sajakha, tei Sakham(Health), Economic Hamkwrai, Kaham naikolhapang(Governance), Infrastructure, Jottoni Hamkwrai(Inclusive Development), Hukumu tei Tourism ni bagwi bo samung tangnai hwnwi sajakha.
Communist Party of India (Marxist) bai
Congress:
 |
| CPI(M) and Congress Flag |
Tripura ni thwng kwrwng bodol CPI(M)- hayakhe Left Front phasal o phainai bidhan sabha ni chongmari ni bagui borok ni kok sakhlaimung bwlai eba manifesto tikhlaikha tei sakha borok 2.5 lakh kwtal tangsamung, kwrwisa umor kwbang luku rokni penson, tei kwcham penson no kwtal khe scheme khaiwi rwjaknai hwnwi sakha. Tei Chiba(15)-laih (page) manifesto o sakha, 10,323 rok no borokni samung kiphil rwnani, contractual sebuk rokno bo regular khanani, tei tribal autonomouso bo teibo phan rwnai hwnwi kok rwkha.
Thanai sal ni Kokthum nai rokni koklam padai o, Left Front ni convener Narayan Kar hai hwnwi sakha “Jefru BJP 2018 o sorkar khao afru ni cmi borok lukuphan (democracy) ni totra o sepbwi hama maya swk khe BJP rok tonikha” hwnwi kok silsakha.
Kar sakha, "Luku rokni Chongmari batai mung ni Chongnani odhikar rokno bo BJP-IPFT naikaniraida rok sekgwi naharkha tei luku rok kok silsai kok tisanani fano odhikar manliya".
"Chwng phainai tal ba bisi (5) ni bisingo 2.5 lakh tangsamung (jobs) tei luku rokni hamari no chwng mungsa kebengrwya, " bo sakha, Chini dagi phang bai sebuk rokno je contractual basis bai samung khai tongnai borok no bo regular khanai".
Kar sakha "Kebo Umor dokchi (60) wngjak tei bisani aji Rs 1 lakh ni slai kom hwnk bono mel penson rwjaknai".
Bo saka "Consumer price index no naiwi Left Front sorkarni sebuk rokni dearness allowance (DA) bosor o wainwi khe barinai tei kwcham penson scheme no bo kwtal khe khainai".
Left front rok kami rokni rang puisa rokno bo dumsana bagui gorib rokno bosor o sal nwira (200) o kam rwnai hwnwi bo kok rwkha.
Kar saka "CPI(M) - Left Front Tripura Tribal Area Autonomous District Council (TTAADC) rokno bo high level power rwnai".
Left front rok piyakma bai kakjak (Corrupt-free) tei luku -bayap chari sorkar khai rwnai hwnwi samani yagulo , Bo saka congress bai alliance wngna bagwi chikonsa panda songchai rejaknai.
CPI(M) rok brwichitham (43) achukthaio saichung batainai tei baksa Left front ni constituents - the Forward Bloc, RSP tei CPI- joto kaisa kaisa seat o batai nai.
CPI(M) bai Seat baklaimani poree tabuk Congress Chitham (13) achukthaio batainai.
Trinomool Congress:
 |
| Source: ANI, Trinomool Congress Manifesto Release |
Trinomool Congress 42 point manifesto karikha Tripura Assembly ni Chongmari ni bagwi 5 February Koktisalo. Party borog ni manifesto no khakchi(10) o bakha, economy, employment, Rwngswrwngmung (education), Chuwaimung (Agriculture), law and order, Sakham(health), bwrwirokni empowerment, social security, civic, infrastructure, governance, tei Hukumu bai Tourism, haikhe.
Phiya aro tongkosong rokni bagwi tamo sajak tong?
Nugo ADC no Phan bangrwnani bagwi kunu sajakya, Rangbai chubachu rwnani bagwi kunu sajakya, Kokborok kok Centre cmi khuluknani kok sajakha, Kokborok no mwthang tonna bagwi, tei dalbibal scheme rok simi phwnangjak hwnwi sajakha.
Chuwainai(Farmers) rokni bagwi, rangbai chubachu rwjaknai, Rwngswrwng tongnai rokno tei Sikla rokni sebuk rwnani, loan rwnani, tei scholarship rwnani, Magwnang tablet baknani, magwnang cycle baknani, 10,323 phwrwngnai rokno rangbai chubachu rwnani, Cultural museum tangnani, akorok wngkha Trinomool Congress ni Manifesto ni highlight rok.
Jotto Party rokni Manifesto no Trinomool Congress no karwi, ADC ni bagwi mungsa mungsa kotor Swlaimung tubu nani kok sajakha, abono karwi, Jobs tei Employment swnamnani, bwrwi rokni hamkwrai, Sikla rokni hamkwrai, rwngswrwngnai rokni hamkwrai, Okra Chakra rokni hamkwrai, Infrastructure, Social Welfare, tei Hukumu bai Tourism rokno jottono party ni Manifesto o kaisa ya kaisa lama twi sajak tongu. Phiya amswk kok kotor-kotor sakhlaijakmani bisingo taklai hapang swnam rok bwswk ba lukurogno rwui mano, abo jora si sannai.
Support East Twipra by Donating to our efforts with the QR code provided or through this UPI ID: swngchar11@oksbi