"Obono ani Paithakni koklam salaimani norok bai, tini ni simi ang politics ni retire wngsinai" sakha Bubagra.

"Charilam ni simi ang thwngwrwngni hapharo yapri barokmani tini charilam ni simi ani thwngwrwngni ni langma no pairwi rwsinai"

#tiprahaste Bubagra Pradyut Kishore Manikya Debbarma, kwraksalo Charilamo luku thum panda o koklam kwchar phuru sakha, "Obo ani Paithakni choba ya haiphano omo ani paithak political speech", Bubagra bini political langma ni retire wngsinai hwnwi luku rokni bwskango sakhlaikha. "Norok tei Bubagra no dangsa o kaui amtwi khe koklam salaima nuglak" hwnwi sakha Bubagra. Bo bini thwngwrwng(politics) ni langma Charilam ni simi no chengmani, 2013 bisio puila bo Charilam ni simi bataimani, oro bo Tabuk Phano kwbangma borok rokno sini khu, tei Lalsingmura o bo kaisa rwngnogo Fan, Table tei Chair bakmani tongu, hwnwi sakha Bubagra.

"Charilam ani 'Janmabhumi' (achaimathai) ya wngphano Charilam ani 'Karmabhumi' (Samungkhaimathai), ang oro belai samung khaikha" hwnwi Bubagra sakha. 

Luku rokno bo bini paithak koklam bai sakha "O Choba kebono MLA swnam na bagwi ya, O Choba kebo MLA wngna bagwi ya, O Choba chini manthai manna bagwi se, tei ang Delhi thangnai, tei aro kaisa kwrak raida swnam rwi tubu wanw chini borok ni bagwi, je swngchar ni borok ma hwnai O Bubagra le bini borok rok ni bagwi mungsa le khai kwlangkha". Bo teibo sakha "Ang lengkha, ang lengsukha, tei phan kwrwikha ani sak go, phiya bwkhao norok ni bagwi hamjakmung tongma bai simi ang tabuk sak jora himwi tongkhu" hwnwi.

@jist.news bai Interview o swngjak phuru "Obo paywi tamo khaina muchung" hwnwi, Bubagra sakha "Lelamung nanai, Kaijaknai, langmao tongwi thangna khe logisong bo nangu, tei ang kaisa Restuarant bo khuluknani muchungu, ani Ama bai tongna muchungo, Hayung naina muchungu, ani kaisa Band bo khulukna muchungu, tei kisa khakchangmani langma tongna muchungu" hwnwi.

Obo de bini paithak Choba hwnwi swngjak phuru, bo sakha "Ang oro ani bebak rwi rwkha, tei obono ani paithak Choba" hwnwi. Chongmari ni ulo tamo khainai hwnwi swngjak phuru, bo sakha "Kok salainai, kok salaima bai wngya khe, chwng chini majority phaikhe tò Hapang swnamnai, tei majority wngwi Manya hwnkhe chwng sak saichung jottoni sai party kotor wngnai, tei kebo bai kok wngya khe Opposition no achuk nai" hwnwi. "Ano kaitor bebak rwkha, nuyungma rwkha, rang rwkha, phiya obo rokno ang kaisa phano thwi phuru twlang thang maya, mung kaham simi kwlai kwlangmanu" hwnwi sawui Bubagra bini kok pairwkha.

Tabuk swngmung lukurogni "Kubui de aswk kheno Bubagra ni Choba pai Sinai? hwnwi, je Chong tongma twi wngya khe kubui de yakar rwnai thang Sinai Bubagra? Bono hamjaknai rokni swngmung tei bini bwskang bono batainai rokni bo swngmung.

@easttwipra.in no follow khaidi Kokborok bai Hayung gwnangni koktwma manna bagwi.

Support East Twipra by Donating to our efforts with the QR code provided in the post or through this UPI ID : swngchar11@oksbi