Taklai bo Northeast ni University rokni bagwi karwi tongjakhunai CUET ni amjokmung.

15 March salmari srangsalo, Department of Higher Education ni bwkhak twi kaisa koimung bwlai kariui UGC no Northeast ni kwbangma University rokni bagwi CUET ni amjokmung rok karwi tongjak mani no teibo agug rwnani sakha.155 March 2023 salmari srangsalo Ministry of Education Department of Higher Education ni bwkhak twi kaisa koimung bwlai 'University Grants Commissiono' rohorjakha, aro Northeast bwkhakni University rokno CUET amjokmung ni karwi tongjakmano tei bwkskango agug rwnai eba pholok rwnani kok sajakha.
15 March 2023 salmari srangsalo Ministry of Education Department of Higher Education ni bwkhak twi kaisa koimung bwlai 'University Grants Commissiono' rohorjakha, aro Northeast bwkhakni University rokno CUET amjokmung ni karwi tongjakmano tei bwkskango agug rwnai eba pholok rwnani kok sajakha.
Bisi 2022 o kwbangma Northeast ni elem rok ni bwkhak twi Northeast ni University rokno 'Common University Entrance Test' ni karjakna wngthung hwnwi koimani ulo, borog ni kok khnaui Northeast ni kwbangma University rokno CUET amjokmung ni karwi rwjakha, phiya abono taklai bo tei waisa pholoknani tei teibo University rokno bo khobnani kok sakha. Aro Tripura University bo khobjagu.

Phiya tangwi yang phasing ni eba Northeast no simi CUET ni karjakna thangwi tong? Oboni phirokmung hwnkhe, Northeast ni University rok simi karjakya, oro Uttarakhand ni University bo khobjagu, sana thangkhe hapung-hathai gwnang haste tei amjokmung khwlairwnani 'Infrastructure' kwrwi rok no se karjakma kwlaiyo. Tamni hwnkhe Northeast tei Uttrakhand belai hapung-hathai bai kwrwngjak tei lama rokni seb-sab bo aswk sok phaya khu yango, tei amjokmung rwnai rokni bagwi bo belai thuknai amjokmung rwna phaiphuru tamni hwnkhe aswk 'Centre' swnamjak kwrwi Northeasto, je amswk kwbangma amjokmung rwnani rokno naui amjokmungo achuk rwi manna bagwi.
Bisi 2022 ni simi no Meghalaya ni Montri Okra Bj. Conrad Sangma Meghalaya no eba NEHU ni bisingo kwlainai bini haste ni rwngswrwngnai rokni bagwi CUET amjokmung no karw nani chaitokmung khwlaywi phaima nugjagu. Hwnkhe miya sarigo Department of Higher Education ni bwkhak twi UGC no koimung bwlai hojak nugmani ulo bo bini khatung-khajamung jotto ni swkang khulugwi sakha, bo swikha "Belai belai hambai Haktor ni Rwng bedek ni Montri no chini koimani no khwnaui NEHU bai kwrwngjak Meghalaya ni College rokno 2023-24 ni bagwi CUET amjokmung ni karma bagwi, tei agini Admission khwlaijakma lama twino agugwi tongna bagwi."


Northeast bwkhak ni University rok CUET ni karjakmani kaham bo tongu tei hamya bo tongwi manu, kaham hwnkhe Northeast ni rwngswrwngnai rok tabuk agini haikheno University rogo habwi mankha, tei kunu juda CUET hai amjokmung rogo achugwi jora khibina nanglakha, tei hamya hwnkhe agini biyal rok tabuk bo wngwi no tongphio nai, agini biyal rogo achukthai eba 'seat' ni biyal rok bo khobjagu, tei kahamgwrwng(quality) gwnang borok rog seb manya wngma rokbo nukjagu, agini lama o 'Corruption' rokbo belai nugjagu, phiya CUET bai khe 'Admissioni' lama rokno swrai swrai khaima bagwi haphang rokbo abono no swkang barogu phiya mukthang ni kok khe haise - taklai bo Northeast tei Uttrakhand haste ni University rogo CUET amjokmung karwi rwjakna thangwi tongu.

Post a Comment

Previous Post Next Post

Contact Form