Kokborok ni chaya kokrok tabuk bo pirjagwi tongkhu - A Little knowledge is a dangerous thing

 

A page from the book 'A Study Guide Tripura' (Source Images - Mack Jamatia | FB)

Kokborok kok sanai rokni bagwi O kok khwnathokma no karwi, belai nangkukma bo khobjago, belai jwngjal ni kogwi tabuk se kisa misa Kokborok ni hamkwrai wngwi tongu, tei Kokborok sanai tei awai khainai rok hamjagwi no hayungo O kokno pirma bo nugjago. Phiya kaisa kuisu si twtwi eba siya twtwi chaya kok rokni awaimung bo waisa wuisu nugjagu, abo nugnani belai wanamasingsa ya, haiphano tabuk hai jora, je jora o bebak swngmung ni phirokmung Interneto manwi tongma mol rogo phano Kokborok ni bagwi saimannani belai thugu, tamni hwnkhe, jora bai baksa Kokborok ni twywi Information rok tabuk bo Internet rogo amswk kwbangkuk khe nugjaya khu. Sana thangkhe mungsaswk swngmung Kokborok kokni twywi tongwi tongkhe A swngnai borok kunu saimanya'ui no ma tongjanai. 

Phiya tereb tereb khe Kokborok no Digital twlangnani chaitokmung kwbangma bodol eba sak baithang saroknai rokno khwlaywi tongo. Haiphano amswk bai wngya khu, chwng teibo chaitokthai kwlayo, hayakhe chwng kwma matwi chini Kokborok bo O Hayung ni kunu Mari khwlai manya'ui kwmai manu.

Amtwi hai patimung rok chini bagwi kaisa swrwngmung haise, O saroknai sa wngwi manna siya twtwi amtwi hai chaya kok sarokhna, phiya aro chini bo khwlaithai kwlayo, chwng chini kokni kubui kokthai ni kokmang rok hayungni borok rokbai pirnani, A barja chini saka se. Kubuni borok chini kok bujiya rok chini kok chaya rokno sarokjatwi no wngwi mano, haiphano kubui kok pirnani barja chini bangra o se.

Kokborok ni twywi chaya kok sarokma bai je Kokborok bujiya rokno bo chaya kokmang rok awaikhwlaima bo kwlayo. O saroknai no chwng koimano bini O bijab ni tei Publication rok sarok phru O chaya wngmano charwui sarokjakna wngthung hwnwi, hayasak chwng kunu khailaimanya.

.

.

Opinion By Chief Editor, East Twipra Publication

(Source Images - Mack Jamatia | FB Page)