Home minister Bg. Amit Shah bai Bubagra Pradyot Bikram Manikya chongbarini result manmani yagulo constitutional solution ni bagwi koklam salaikha Srangsalo Hasteni Guest Houseo.
Koklam panda phaimanjakha Bg. JP Nadda, Bg. Himanta Biswa Sharma, Prof. Dr. Manik Saha no karwi Tipra Motha Party (TMP) ni kwtal MLA rok tei bodolni kuchuk Ojamarog.
Tipra Motha Party achaiphuruni simi Greater Tipraland (costitutional solution) eba alaida constitutional solution ni sanmungno twiyui achaima nukjakha. Phiya chongbarini swkang "Greater Tipraland" Sanmung bodolni bising kwrak wngmabo nukjakha. Phiya tabuk chongbarini yagulo "Greater Tipraland" ni sanmung kebel wngwi oslumani nukjagwi tongkha HM Bg. Amit Shah "Greater Tipraland" no karwi alaida sanmung rwna hinui gosimabai Bubagra Pradyot Manikya bo bodolni MLA rok twlangwi malaimabo nukjakha.
Chitham(13) acukthai manwi Tipra Motha Party(TMP) manmabai ayang phaising BJP thamchitham(33) kwbang achukthai manwi kwplai wngmabai Haphango achukha. TMP party hasteni taklaini thwngrwngo kingmaker wngmankhe TMP ni sanmung mananw hinui khachonglaimani lukurog phiya paithago mohai wngma nukjaklia.
Paithago "Grater Tipraland" no karwi alaida constitutional solution yachakna tiyar wngkha Tipra Motha rog, Salnwi salthamni bising interlocutor chongwi Hasteni tongkhorno naiyui nangkukma constitutional solution rwna hinui gosikha HM Bg. Amit Shah Tiprasa rogno.
Bahai wngno constitutional solution bwswk joratwi oh constitutional solution ni bisingtwi Lukurog yogma mano. More power, greater autonomy, separate legislature & separate political right, direct funding to TTAADC, article 244(A) rogni bising bomo rwjakno wanama bisingtwi khajayui nasinglaijak Lukurog India Haphangni Thanio.
HM Bg. Amit Shah bai malaima yagulo Bubagra Pradyot Bikram Manikya bono khakaham yapharwi kok kwcharkha" Home Minister Haani bwsarogni bagwi constitutional solution rwna hinui tangraida yago nana chengkha. Moni bagwi khajak jorani bising khoroksano interlocutor chongjaknai hinuibo kokrwkha. Ang Home ministerno hambai yapharo Hani bwsarogni soisoi problem no saiman mani bagwi. Bru Accord sign khwlaima bisingtwi Chwng chini Bru rogni tongthai rwiman phikha tei mo haikheno tini koksalaima bisingtwi chini bumuk kwthang tonganw hinui ang kha chongo. Tini dophano twiyui simi koksalaijakha alliance tei cabinet no twiyui mungsa swngmung eba kok salaijaklia".
.
.
Tags
Koktwma Kaham