Chongmarini 'result' sarok paima yagulo chengkha bulai-toklai ni patimung haste gwnangwi no.

 

Tripura Map

Tripura haste o Chongmari paima brum-brum no themrangrokni samung sitra tangmani, bulai-toklai, walai-soklai tei nok-nukhung, tei bolong-halong sokjakmani tei rangrokni deramung rok kwtal kokya O hasteo.

Abo haino taklaini Chongmari paima yagulo bo, amtwi hai patimung khna hornani belai uanama singchaya kwbangma borok rokni bagwi. Phiya amtwi hai patimung rok paithago datino Wainjwi-Tipra wngwi thangnani belai laite-te seb bo tongu. Tamni hwnkhe O hasteo Tiprasa rok kwbangkuk tongmani simi haste ni Bangthaya bosongno khobjakna chengo, aphuruni simino Tiprasa rokni khao kirima tei thangwi tongna bagwi jesa phano kwlaithai ni uansukmung phayo', tei Wainjwi bosongni borok rok kheba 1980 ni choba no muitu khwlaywi borog kwbangkuk phano borogni khao bo kirimungrok tongu. O kirimung borok rokni khao tubui belai kwlaikheno bosong bai bosong ni bising choba phwnangrwi manu kisisa horjwlai baino. Aboni bagwi no kwbangma thwngkwrwngrok obono borog ni 'sakni-hamkraini' bagwi samungo phwnango. 

Kwbangma 'Nationalist Wainjwi' tei 'Nationalist Tiprasa' hwnjaknai rokno O hor phwnangnani samung khayo tei hasteni tongkwchangno swbainani chaitogo. 

Wainjwi rokni uansukmungo tongkosong Tiprasa rokni saka kama naimanya ni bagwino, borog Tiprasa bai Tiprasa rokno nasle rwnani samung bising bising twi khwlaywi no phai tongu. Tiprasa bai Tiprasa nanglai phuru borogni bokhorogo amtwi haikhe uansukmung daui rwo, je borog sak baithangni bosong kaisa ni borok no tola khiklainao kunu chaya samung khwlaima nugjakya.

Miya hai salo bo kwbangma thayo Wainjwi rok Tipra rokni kamio, tei nok-nukhungo choprobmani patimung rok bo nugjakha, tei lukurokni koksilchama twi 'Naimwthang bedekrokni' richum kanwi Tongkosong Tiprasa rokno buphaimani patimung bo khna horkha.

Haiphano aboni bisingo kwbangma chaya koktwma sarogwi, agini mangpili rok teino teisa pirlaywi lukurokno amang-chimang khairwi tei kirimung ni hapharo tubuma bo nugjakha.

Khowai hangkhorni kwbangma thaio, Bishalgarh, Rajnagar, Jirania bwkhakste, Mohanpur bwkhakste, Ranir Bazar rok hai kwbangma thayo amtwi patimungni koktwma rok mankha.

Phiya Tabuk swngmungkhe abose, tei bwswk amtwi hai patimung rok Chongmari brum-brum nugjakna tongkho tei bwswk lukurokni nok-nukhung sokchajakma, tei langma choma nugna tongkho?

Swlaimung ni nobar tabuk phano sib hormani nughorya.