Isri Pragya Debbarma, INTACT Tripura Chapter tei Citezens ni adong wngwi bo Nuyungma (Ujjayanta Palace) ni Durbar Nok Haste (State) museumo 2023 ni G20 Summit ni Horni chamung ni bagui songchajakma no twiwi khadumung phunukha.
Baksa borok G20 Summit ni panda ni horni chamung Nayungma(Ujjayanta Palace) ni Durbar ni kotor khotol(hall) o songchajago hwnwi saimanbaiya na Durbar kotor khotol no chwng khotol (room) hwnwi simi salaikhe chalaigwlak phiya laibuma bai gwdaljak tei kwthar thai hwnwi mano, tei oro Tripura ni luku bosong rokbai gwdaljak kaisa borom rwui phaijak bisi 122 wngkha.
O thaino Tripura ni Ha Bubagra rokno 'Raj Abhishek'( Coronation) khainai bagui swnamjakmani se belai no tongkwthar tongraida bai gwdaljak tei nangkukma thai phiya chana nwngna tongthokna bagwiya.
Romdi agi Ujjayanta palace state museum wngna swkang State Assembly nokthar hwnwi bo samungo phwnangjakmani nukha, o thaino aphru Elemi(speaker) ni nangkukmani samungno phwnangna bagui tangjakha.
Khadumani bisingo, Durbar Kotor khotol( hall) ni sinimungno hamya khairwkha state Government ni bisingtwi tei belai wa bo wanamasingsa.
Yang babaisa digi khe borog chini Hukumu tei mukumu no Borom rwo hwnwi salaio, phiya khaimani bole oino samung haini bagui borog no lukurok ni thani nakar sanna wngthwng tei chaya khaimano chaliya hwnwi sana bagui koikha.
Isri Pragya Debbarma sakha, "O hor ni chamung puilao 5 star hotel O se songchajak tongmani phiya nokphang(Authority) rok achumsa Durbar Hall o se tongthokmung panda khaina bagui songchairwkha. Ang kaisa kuisu mangpili rwirwkha tei ag khakhaio Tripura ha ni lukurok je O Bugrakhor no borom rwi tongnairok ani kok nangjaknai tei ani kha khammung no khorang tisanai. Je thayo salsa Bugra achukthai(throne) tongmani A thaio no tabuk hor ni Chamung ni bagui songchai rwma ni belai khe chini Hukumu, mukumu, tongthar bai gwdaljak thai tei tongkwthar no borom rwliya tei lachimung rwkha. Ang kha khaio kwthar thai no tongthokmung tei chana nwngjaknai khotol(room) ta swnam thwng" hwnwi.
Museum authority ni bwkhaktwi Durbar Hall no teisa kwtal khe Bubagra ni achukthai samlalaikhe swnamnai hwnwi kaisa wansukmung tongmani, bini naimung wngkha Tripura haste ni lukurok no sinithwng saimanthwng hwnwi phiya saknangya tongmung bai, chwng omono nukgwi kirio tei wanao tei Haste haphangno no laibumano borom rwna wngthwng je manna tongmani.
Tags
Koktwma