Chwng Twi ni nangkukma aphuru no sio jephuru chwng twi kangwi tongo haiphano nini thani twi nwngjaknai kwrwi, tungphlama bai tukuna muchungu phiya twi tukuna bo twi kwrwi, aphuru se borok rok twi ni nangkukma kubui khe sio.
Aguli hai Municipality rogo tongwi je thaio pherang ni biyal kwrwi, twi kaham nwngnani biyal kwrwi, yago rang puisa tongkhe nangma manwi haino na'ui mano, amtwi hai rogo tongwi Kami amchai tei hachwk beserni bagwi wansuknani aswk khorokrogo phaya na. Phiya baithangni kok kubui le obono, bisi kwdwkma romwi Kami amchai tei hachwk beser rogo twi kaham manwngnani, tei twi simi phano kaham khe mannwi tongnani seb tabuk phano rwjakma nugjaya khu. Bisi brum-brum tungphlama molo, jephuru watwi waya wngo, Twi ni Biyal, O Aguli bai chalwi tongnai kami tei hachwk besero swrai swrai khe nugjak phayo.
Kwbangma thwngkwrwng bodol rok Chongmari ni swkang kotor kotor swmai tangwi kwlang phano, borogni swmai suphung nani yapri se'ui le rwo phiya lampra brum-brum sorni pipe kotor-kotor simi berajak rok nugo. A samungrok kaham khe khwlaijakna swkangno yakarwi rwjakma rok nugjago, phiya Chongmari ni swkang abo tei waisa romjak phinai lukurokno samung khwlaimani mukumu rwna bagwi, phiya baithango A samung buphuru paino abo kebo saimanya.
Dopha hamkwrai ni samung tangnai rok khe obo twi biyal rokno nugmanjaya, Chubana bagwi borogse haphang tei thwngkwrwng bodol rokni sai swkang-swkang agug phaima nugo. Kaisa-kuisu 'Non-Governmental Organisation' rog obohai biyal ni molo phano saktharwi dophano chubana nangu hwnwi O samung bangra boksai nao, kami bising-bisingo thangwi, hachwk beser-besero habwi borogno Twi baagwima samungno khabai-khukbai no khwlaima rok nugu.
Naina thangkhe twini biyal no chaitokha hwnkhe sokomorwi no manu. Phiya arobo pherang ni 'Line' swngjakma hai, pala simi kaywi tei tar rok simi swngwi kubui pherang khe laya haibo wngwi mano. Twi ni 'Pipe' rw'ui bo bisi-bisi romwi twi hojakya wngma bo nugwi no tongo, Twi ni twywi lama kasulaima, khorang tisalaima chwng prai se nugu, haiphano khunju khwna horya haphang, kok khe phiya rw'ui no kwlango, haiphano baithango samung phwnangma nughorya. Twi ni Biyal ni yakni tongkosong lukurokno tikhlai tubui man phano kwbangma kuchuk achukthayo achuk tongnai rok abono nayani bagwi no tabuk O biyal swrai swrai khe nugjagwi tongkho.
Chwng hachwk kami rogo bahai khe tongkosong lukurok twi ma khóklai, aboni mangpili le waisaya waisa nu-no nugkhna. Gati tola twimuk ni twi tei twi goirang, hakhor chikon sa khurwi hathai sakani twi kwlaywi aro kuthumsa wngkha khe se, A twino khuri bai sangkiya'ui golao da'ui chango khebwi, tei waisa hapung botok ka'ui thango nogo. A twino sangkiya'ui no abono no nwngo, muisongo, tei bebak juda nangma samung rokbo abo baino khwlayo. Sangkiya tei twi muthungwi nwngyani bagwino kwbangma bemar hamya rok manjagwi lumma bo nugjago. Twini twywi kaham phwrwngmung rwjakyani bagwi tabuk hai jorao phano, Malaria manjakma praino nugjakhu.
Belaikheno kara kok sama hai chini hani bumung Twipra (Sanskritized - Tripura) wngwi bo, mungo 'Twi' tongwi bo tabuk phano kwlwkjak kubui hani bwsa tongkosong Tiprasa lukurok Twi kaham no karwi Twi simi phano mannani biyal wngwi no tongkhu.