RSKC, 7 June'o Aguli ni North Gate ganao salsa ni bagwi kaisa 'Sit-in demonstration' khlaina thangwi tongu.

CBSE ni Kokborok Subject ni amjokmung rogo Roman Script bai swinani seb rwngswrwngnai rokno rwna nangnai ni sanmungo Roman Script For Kokborok Choba ( RSKC) bugrakhor Aguli ni North Gate gana, salsa ni bagwi phungni damchi (10am) ni simi 'Sit-in demonstrationo' achuklainai.

Phainai June talni salsni(7) salmario Roman Script For Kokborok Choba (RSKC) bugrakhor Agulini North Gate ganao salsa ni bagwi kaisa 'Sit-in demonstration' khlaina thangwi tongu. O 'Sit-in demonstration' phungni damchi(10am) ni simi chengwi sarikni dambrwi(4pm) jora khlaijaknai, tei khorok brwira(400) ni simi khorok bara(500) swk borok kuthumwi manu hwnwi sajakha.

Roman Script For Kokborok Choba (RSKC) tongkosong Tiprasa rokni jwngjal kotorni katina bagwi songchajakmani kaisa bodol rokni Motha. Bisi 2022 o BJP haphangni bwkhaktwi Kokborok no Devanagari swithai bai khwlainani chaitokmungno kasuna bagwi tei Kokborok no Roman Script bai bebak berem ni rwngswrwngmung khlaithani swimannani naharmung bai songchajakha. 

RSKC kwbangma bodol rokbai songchajak kaisa motha aro Kokborok Sahitya Sabha, Twipra Students' Federation, Movement for Kokborok no khobwi kwbangma NGO tei thwngkwrwng bodol rokbo tongu. 

"RSKC achaimani kaisano naharmung Kokborok ni bagwi Roman Script", hai hwnwi no sakha RSKC ni achukphang Bikash Rai Debbarma. 

Bahaikhe O choba tei philsa kasakha?

Kebengnai bodolni Ojama MLA Animesh Debbarma ni koktuno kokphirogwi hasteni Montri Okra Dr. Manik Saha koktun hormao "CBSE amjokmungo Kokborok Subject no kainwi swithai bai swi rwimangwlak CBSE tei TBSE'o wngwi phaima hai Kokborok Subject ni swngmung bwlai tei rwngswrwngnai rok swimani phirokmung rokbo bebak Bangla swithai baino wngnai" hwnwi sajakha. 

Obono seja'ui O talsa romwi haste gwnangwi no kwbangma tongkosong Tiprasa rokni bodol lamao nongkhorkha. 

Aroni bisingo Twipra Students' Federation obono twywi jottoni slai khorang rakrwkha, tei tabuk bai Bishramganj, Aguli tei Mandwi hai thayo oboni twywi choba o nongkhorkha TSF. Tei bwskangni salo dati O sanmung rok supungjakya hwnkhe teibo choba kotoro nongkhornai TSF, hwnwi sakha TSF ni GS Hamalu Jamatia, Mandwi'o. 

Abo haikheno RSKC bo June talni salsni(7) salmario Kokborok Subject ni bagwi Roman Script ni sanmungno twywi salsa ni bagwi 'Sit-in demonstration' khlaina thangwi tongu.

Information regarding holding of one day Sit-in demonstration by RSKC on 7th June 2023 at North Gate, Agartala.

East Twipra no RSKC ni Achukphang hai hwnwi sakha "RSKC ni kaisa no naharmung, Kokborok ni bagwi Roman Script. O 'Sit-in Demonstration' bai haste Haphang no kaisano koktun horna nayo Tiprasa sanno Kokborok ni bagwi Roman Script. Jotto bodol rokno tei muchungwi tongnai rok A salo phaywi borogni chubachu rwphywi manu tei chini O chobao manjuimanu."