 |
| Kokborok kokno Roman swithai bai swimanino twywi MDC Padma Tripura bini Facebook Post twi kok hamya samani no nugwi srangsalo TSF Sadar East Divisional Committee ni adongrok Radhapur thanao, bini mungwi kaisa FIR khwlaikha. |
TSF ni koksilchamung hwnkhe Padma Tripura bini Facebook Post twi Roman Script bai Kokborok swimano tei Kokborok sanai rokno begaikha hwnwi.
Padma Luchan Tripura sabo?
 |
| Padma Luchan Tripura, MDC Kathalia-Mirja-Rajapur (ST) |
Padma Luchan Tripura, Kathalia-Mirja-Rajapur (ST) achukthaini chongjagwi bisi 2021 no MDC wngwi kokchab nogo habphaikha. Hangsu Tripura kebengnai bodol ni Ojama tongmani phiya TIPRA Motha habmani yagulo Padma Luchan Tripurano no tabuk TTAADC Kokchabnogo kebengnai bodol ni Ojama hwnwi manu. Padma Luchan Tripura bini kokbanglai Facebook Post ni bagwi bo sinijagu. Laithangnai sal rogo bo bó kwbangma kokno twywi bini uansukmung kwcharkha bini Facebook Post, TV, tei Media rokni bwskango. Phiya tabuk khe bó tamo no sama tongwi, TSF bai FIR rwjakna nangkha?
Padma Luchan Tripura ni Facebook Post tamo?
A Facebook Post Bangla bai swijak tei hai hwnwi sao, "Obo tamo siyarok hai hwnu, Kokhe nango Kokborok, tei swithai kheba nango Roman? Phatar hani swithai, Amtwi tomung hamya rokni bo kaisa thakmung tongna nangu" (translated to Kokborok).
TSF ni koksilchamung, oro Siya eba অপদার্থ hwnjakmani Roman swithai bai Kokborok no swirwnani sanmungno tisanai rokno se sajagu hwnwi, tei obo bai lukurokni bisingo tongkwchang kwmai manu hwnwi TSF rok koksilchakha.
 |
| FIR submitted by TSF |
MDC Padma Luchan Tripura ni sakao haste ni tongkwchang hapharno swbainani chaitokna naima bagwi, bini tomung 'Indian Penal Code' ni Criminal Offences ni bisingo kwlaima bai, bini saka kwrak majra rwjakna wngthung hwnwi TSF rok FIR khwlai phru sakha.