Tangwi TSF Sadar East Division ni Reform aswkhe nangkukma?

 

Miya 11 July, 2023 salmario, Montfort School ganani Chengkharu Kami Jaaduni Khorang Hallo, Philthamchichar(38th) Sadar East Divisional Confrence khlaijakha, tei aro Sadar East Divisional Committee tei Khumulwng Unit ni reform khwlaijakha.

Twipra Students' Federation eba TSF, bini achaiphang ni simino "Regional Aspiration" rokno twywi bisibachi ni saiphano kwbangkuk jora romwi choba khlaiphai tongu. Kokborokno haste ni kok swnamnani simi chengwi, ADC ni sanmung, rwngnogo Rignai-Risa ni choba, Lashkar rogo ST ni nornani sanmung tei Kokborokno Roman swithai bai khwlainani choba no khobwi kwbangma dopha hamkrai ni samung bo TSF khlai phai tongu. 

Bisi 1968'o TUJS tei TUKS bai baksa-baksa O rwngswrwngnai rokni buthu bo achaimani, bini bisibachibrwi(54) ni ayugo kwbangma saka-tola wngma baikhe laywi phaikha. "Haste o kwbangma rwngswrwngnai bodol phaikha, tei kwmai thangkha, TSF no swbainani, TSF no sokomornani kwbangma chaitoklaikha, phiya tabuk phano TSF kwrwng-kwthang tongkhu.", Mg. Sunil Debbarma, Kwcham TSF General Secretary.

TSF achaimani bisichi (10) ni yagulo bisi 1978'o, TSF no sokomorna bagwi GMP rok TSU songchakha, kwbangma tekto-birman manma yagulo bo, kung-kuchukhe tabuk bo TSF ni bana tisai no tongkhu, hwnwi sakha TSF ni khoroksa kwcham adong.

TSF ni bisingo bo achukthai seklaimung, naslelaimung, kok silchalaimung hai patimung rok laithangnai jora rogo kwbangma nugjakha, TSF no baknwi swnamnani chaitokmung bo khwlaijakha, phiya kwrak saktharmung tongma bagwi amtwi hai patimung wngnani jora phai liya, haiphano TSF ni nongkhorwi juda rwngswrwngnai bodol songchama rokle nugjakha. Kaisa pirsajak koktwma ni bisingtwi sajago, Mgt. Patal Kwina Jamatia, TSF ni achukthai segwi manya wngma baise IPFT'o habwi ATISA no songchao, hwnwi.

TSF ni achukphango juda-juda dopha ni borok rokno achuklangkha, bini Division ni achukphang rogo bo Darlong, Hrangkhawl, Molsom, Rupini, Kalai, Jamatia, Tripura, Uchai, Murasingh, Debbarma, Halam no khobwi tongkosong Tiprasa bosongni jotto dophani borok rokno waisaya-waisa chariphang wngnani seb mankha. TSF no ku-kubui thansa tubunai bodol hwnwi sakhe, abo chaya wnglak, tamni hwnkhe jotto Tiprasa dophani borok rokno no seb Rekha TSF.

Phiya belmung tei kebengmung phaima bai waisa jottoni slai kwrak rwngswrwngnai bodol bo komornani jorao waisani kwbangkuk jorano sokphaikha, bini kwbangma division thwywi thangma bo nugjakha, TSF Khowai-Town Committee, je Committee'o tabuk ni LOP Mg. Animesh Debbarma, Tangphang wngwi samung khailangkha, A committee tabuk ni jorao kwrwikha, TSF Udaipur Divisional Committee waisa jotto ni slai gwnang tei borok bangkuk Committee tongmani tabuk komorwi thangkha, abo haikheno phatar hasteni kwbangma TSF ni Unit rokbo komorwi thangbaikha eba kubuni rwngswrwngnai bodol rokbai kobolwi naharjak baikha. 

Tabuk baithango TSF ni kaichuku(9) Division eba bedek tongu, TSF Town and College Committee, Sadar East Divisional Committee, Sadar North Divisional Committee, Sadar South Divisional Committee, South-Zone Divisional Committee, GandaTwisa Divisional Committee, Longtrai Vally Divisional Committee, Shillong Unit, tei Guahati Unit.

Kwdwkma jora TSU bai swklwkjagwi phaima bai, aboni yagulo ATISA rok kasama bai, tei tabuk TIPRA Motha ni bising twi TISF songchajakma bagwi bo TSF ni kwrak yarwng belwi phaikha hwnwi sajagu.

Phiya kwbangma jwngjal ni bisingo bo, borok amswk bangthaya ni bisingo bo, tongkosong Tiprasa rwngswrwngnai rokni jwngjalo jottoni slai swkang logi rwinai tabuk bo TSF no khu. Rwngswrwngnai rokni Scholarship ni jwngjal hwn di, Mark rok manyani jwngjal hwndi, kubuni dopha bai tekto rwjakmani jwngjal hwndi, rang-puisa nangmani jwngjal hwndi, tei seb-sab manya ni jwngjal hwndi, bebak thayo no TSF no no puila nugwi soknai.

O bisi 2023 ni May Talo no Rashyabari Community Hallo TSF Central Committee ni Reform wngwi payu, aro kwtal Achukphang tei kwtal Tangphang rokno khobwi kwtal Executive Adong rokno bo chongjakha, kwtal Central Committee ni naharmungo Kokborok ni bagwi Roman swithai ni sanmung no puila Thai rwjakha. 

Aboni yagulo Town tei College Committee no bo Reform khwlaijakha, aro achukphang hwnwi Mg. Satyajeet Debbarma no chongjakha tei Tangphang hwnwi Mg. Partha Debbarma no chongjakha. Town Committee no TSF ni jottoni slai kwrak Committee bo hwnjagu, tamni hwnkhe jotto slai kwbangkuk choba Town Committee no nongkhoru tei Central Committee ni adong rokbai bo borokno swkang kwrwgwyo. Phiya dalsa Town Committee simi rakma bai bo wngya, buphang kwrakhe bachai tongna thangkhe, bini yarwng, bini bwsak tei bini bebak Kotor bedek rokbo ragwi tongna nang nai, hayasak buphang kwrakhe nobar kotorni bwskango bachai manya.

Aboni bagwi no Miya 11 July, 2023 salmario, philthamchichar(38th) Sadar East Divisional Confrence wngmani no belai nangkukma hwnjagu, tamni hwnkhe TSF hai bodol kwthang tongkhe se Tiprasa rokni kubui manthai rokni khorang tisajagwi tongnai. Philthamchichar(38th) Sadar East Divisional Confrence'o Sadar East Divisional Committee tei Khumulwng Unit ni reform khwlaijakha, aro TSF SEDC ni kwtal President hwnwi Mg. Pravat Debbarma no chongjakha tei Tangphang hwnwi Mg. Paul Debbarma no chongjakha, tei TSF Khumulwng Unit ni kwtal President hwnwi Mg. Biki Debbarma no chongjakha tei kwtal Tangphang hwnwi Mg. Sachlang Debbarma no chongjakha.

"TSF kwrak tongkhe se Tiprasa kwrak tongnai, TSF khorang tisakhe se Tiprasa ni khorang sóknai", khoroksa kwcham TSF ni adong hai hwnwi sakhlaikha.