 |
| Purnomoy Chakma tei Tarun Chakma ni nukhungsong |
Unokoti ni kaisa Chakma kami'o khoroknwi takhuk Purnomoy Chakma tei Tarun Chakma bórokni nukhungni borokrok bai baksa Buddhist ni Kristan wngma bagwi kami ni borokrok bai naislejakha tei khuk hamya khaijak kha. Chakma motharokni kosong tongthar Bud (Budhism) wngma bagwi bórok Purnomoy Chakma tei Tarun Chakma-ni nukhung Kristan wngma bagwi bórokno Kami ni rwkhlaikha tei girjanokthar (Church) rogo thángnani bo kasujakkha. Kamini tai nukhungni borokrokno bórok bai koksakhe tei gwdalkhe 'Chakma Mothani kerong-raidarok bai khe majra rwjaknai hwnwi sakhlaijakha.
Puronomoy Chakma Kristan habma yagulo bini samungni bo rwkhlaijakha, swkang bo 'Mahatma Gandhi National Rural Employment Guarantee Scheme' ni bising twi samung khwlai tongmani, phiya tabuk bóno samungrok rwya khlaijakha.
Tarun Chakma hwnkhe Riksaa (Rickshaw) chalokgwi rang ajimani, phiya tabuk bini Riksaa'o borok kakhe, A borok khok 40,000 rang masunai tei Chakma motha ni kerong-raidarokni bisingtẃi khe majra rwjaknai hwnwi sajakha. O jwngjalrok wngma nugwi hasteni Kuchuk Bujthumkhung (High Court) makebengkha. Kuchuk Bujthumkhung (High Court) naimwthangrokno O patimungno cherwi naina bagui dagikha, tamni hwnmale bórokni O raida Barotni kerongbijapni raidao kwlaya.
Barot hai 'Secular' hao amtwi tomungrokni mungsa thai kwrwi, Barot haktorni kerongbijabo Article 15 ni bisingo swrai-swraikhe swijak tongo, kebono phano bini tongtharni mungtẃi, bini bosongni mungtẃi, bini dophani mungtẃi, bini sirni tẃi eba bini achaima thaini tẃi saknangya khlaywi manya hwnwi, abotẃi hai khlainairokno kerong-raidarokni bisingtẃi majra berjagwi manu.
Chakma Motharokni bwkhaktẃi tumung Chakma bosongni borok Kristano hapkha hwnkhe abono ‘samung-chaya' eba 'sumsok' hwnwi gosijaknai. Haiphano, aro swngmung achayo, Thansakhe tongnani de belai nangkuk? Eba tongtharni mungwi dopha kaisano borokno khakna de nangkuk? Tumung borokrok tabukse tongtharni mungwi khakjak tonglayu hwnkhe, ulo mung solaiyani bagwi bo khaklaijagwlak de? Wngwi mano bórok kristan haiphano bórok bo A 'Chakma' mungthaíno no (surname) twywi tongu, borok tabukbo 'Sidol 'chaitongkhu, tei tabukbo, bórokno naslerjaknai tei khukmusunairok koksamni 'Chakma' kokno no saitongkhu. Bórok tabuk Kristan wngu hwnwi tekto rwjakmani abo belai khakhamani kok. Sana tangkhe Buddha bo sakbaithang Chakma ya. Haiphano chakma rok bono puito khayo. Jisu bo Chakma ya haiphano bórok tumung Jisu-no puito khayo tei bini sama lama tẃi himna muchungu hwnkhe tangwi bórokno kasuthaí kwlai? Bosong kaisani bisingo khakmung tubui tamo bo mannai? Tamo kokno hayung gwnangwi tei bosong bisingni thiangno pirnani naikha? Abo aroni uansuknai kwrwngrok simi se sa'ui mansinai. Phiya khathansa tei hamjakmung bai simi kaisa-kaisa dopha kuchugo kasaui manu, A kokno bo muitu khlaithai kwlayu, tongtharni mungwi dopha kaisa ni borokno khaknairok.
Kokbiti by - Emi Jamatia, Cultural Affairs Correspondent