 |
| Boromgwnang President Droupadi Murmu-ni yakbai Rajat Kamal Sokat mankha Tripurani khoroksa Tiprasa Mg. Sujit Debbarma, 'Fire on Edge' film ni bagwi. |
 |
| Fire on Edge ni Director tei Producer Mg. Sujit Debbarma bai Mg. Pranab Jyoti Deka |
'Fire on Edge' no 'Best Anthropological Film', 'Non-Feature' ni bidalo (Category) borom yapharjakha. 'Fire on Edge' kaisa Tiwa Kokni toke, abono 'Produce' tei 'Direct' khwlainai rokbo Mg. Sujit Debbarma bai Mg. Pranab Jyoti Deka-no, tokeni lokmung soti thamchichuku (39 minutes) kaadrop wngu.
'Fire on Edge' no laithangnai August talni salnwichibrwyo (24 August) 'Best Anthropological Film' 'Non-Feature' ni bidalo (Category) borom rwjaknai hwnwi sakhlaijakma yagulono O tokeno teibo lukurok sininani chengkha. 'Fire on Edge' no Risen North East, BOROK Motion Picture, tei One Horned Picture-ni bana bisingtẃi tikhlaijakha.
'Fire on Edge' oboni swkang kwbangma Film Festival-rogo bo phunuknani sebmankha, tei kwbangma sokatrokbai bo borom yapharjakha. 'Fire on Edge' no 'Himachal Short Film Festival 2022-o', Wainwichichar (28th) 'Kolkata International Film Festival (KIFF) 2022-o', tei St. Anthony's College, Shillongo luwajijakma 'Indie8 Documentary Film Festival 2023' rogo phunukjakha. 'Fire on Edge' no 'Cultural Cinema 2023-ni 'Official Selection' bo swnamjakha.
'Fire on Edge' toke bai kaidok (6) sokatni borom yapharjaknani chongjakha Assam-ni wngwi National Film Award-o, phiya khakhama kokhe abono takhlaibo bisi brum-brum hai Tripurani kaisa phano toke National Film Award-o sógwiliya. Tripura-ni wngwi paithak toke National Film Award-o sogwinai wngkha Father Joseph Pulinthanath bai Direct khlaijak 'Yarwng' abobo bisi 2009 ni kokse.
 |
| Fire on Edge ni Poster |
Kwbangma bórokrokni bwkhao uansukmung phaywi manu tangwi Tiwa-rokni saka documentary swnamjakma toke National Film Award-ni bagwi chongjakha? Tiwa rok sabo? Tangwi khoroksa Tripurani Tiprasa Assam-o thángwi Tiwa-rokni sakha toke swnamwikha?
Tiwa kaisa Assam hasteni tongkosong bosong. Bórok Assam hasteni bisingo Schedule Tribe-ni sinimung rwjak. Bórokno Assam-ni laibumao 'Lalung' hwnwi bo sinijagu. Tiwa bosongni borokrokno Assam hasteni Karbi Anglong hangkhorni salthang bwkhak phasing kwbangkuk manthogu. Bórok hukbar khlaywi chái thangnai bosong, bórokni hugo bórok Mai-ni logi hásing, móso, swtwi, akorokbo kayo. Tiwa bosongni bórokrok bórokni pandarok wngphuru Tiprasarokni 'Gora' hai samla-lai nẃngmungrokno bo nẃngnani hamjagu. O toke Tiwa bosongni borokrok bórokni bolong-halongrokno narwk tonnai chaitokmung tei aboni kwcharo kebengmungrok phaimanirokno phunuknani chaitokha, tamni hwnkhe Karbi Anglong hangkhor 40% bolongbai kholopjak, tei abono thinang bosongrokni bagwi mwthangwi narwknani barja tabukni borokni yagose, khúk kwrwi tók, á, buphang-waphangrokno mwthangwi manarwkhthai, O kokbothoma-ni sakano 'Fire on Edge' toke.