 |
| Representative image |
MTN Productionni luwajimung bai Mr Tripura, Miss Tripura tei Mrs Tripura ni bataimung rok khlaijakna thángwi tongu tei aro Junior Mr tei Miss Tripura ni bataimungrokbo wngnai. O bataimungni obono puila eba First Edition, O Beauty Pageantno kwplai wngnairok, Haktor beremni bataimungo Tripurani bwkhaktẃi Mr India, Miss India tei Mrs India Title ni bagwi batainani seb mannai.
Aro Mr tei Miss ni bataimungni bagwi bisichidok (16) umorni slai kwbangkuk mawngnai, Mrs ni bagwi bisichichar (18) umorni slai kwbangkuk wngnai, tei Junior bataimungrokni bagwi bisiba (5) umorni slai kwbangkuk mawngnai.
MTN Production bai luwajijaknai O bataimung tabukswk jora Tripura'o wngwi phaimani 'Beauty Pageant' rokni bising jottoni slai kotorkuk Beauty Pegeant wngnai hwnwi sakhlaijakha bórokni Promotional Banner rokni bisingtwi.
O bataimungni Media Partners rok wngkha Barot haktorni kotorkuk Mediarok, abo wngkha Aaj Tak, GTN tei Saas Bahu Aur Betiyan (TV Serialrokni koktwmarokno phunuknai Channel).
Muchungwi tongnai borokrok O bataimungo eba O Beauty Pageantno bataýwi kwtal swrwngmungrok swrwngwimanu tei obotwi hai bataimungrogo tamorok khlainani nang, aboni bo simung naharwi manu, tei khúrsai sana thángkhe masao, tabukni sikla-siklirokni bagwi belai seb kaham wngwi manu obotwi hai bataimungrok. O bataimungo chwrairokni bagwibo Junior Mr tei Miss Tripura ni bataimung tongu, chwrairokbo oro bataýwi kwbangma kok swrwngwi manu. Tei kaijajak bwrwirokni bagwi bo O bataimungo seb rwjakha, kaijajak haiphano Beauty Pageantrogo batainani bwkha tongnairokbo tabuk oro bataýwi manu, Mrs Tripura wngnani bagwi. Obo hai seb rokno khabai-khukbai yachaklaikhe se thinango obo hai bataimungrok teibo kotorkhe songchajakphinai.
Muchungwi tongnairok E kokduk tẃI kwrwngwi manu, teibo saimanna bagwi:- (+ 91 8787458298)