 |
| Barot haktor gwnangwino Osa Mwtaino kwbangma mung bai ringjago tei dal-bidal lamatẃi O terno palaijagwi phaitongu. |
Bisi brum-brum Osa mwtai palainani bagwi chini Tiprasa wngthung eba wanjwirok wngthung jotto no baksakhe Osa mwtai palailayo chini O Tripura hasteo.
Durga Puja eba Osa mwtai wngkha Barot haktorni kaisa mungwnang Ter, borokrok Ama Osa no boromrwnani tei surilainani bagwi Osa mwtai ter palailayo.
Osa mwtaini sal wngkha Ama Osa kwplai wngmani Raikhos Mahishasura'ni saka eba Kaham kwplai wngmani hamyani saka.
West Bengal tei Barotni kwbangma haste gwnangwino borokrok Ama Osa ni kotor-kotor pandalrok tangwi, Ama Osani mangthong swnamrw'ui khulumwi mwtai palailayu.
Mo haikheno chini Tripura haste'o bo Ama Osani kotor-kotor mangthong tei Pandal swnamwi khulumwi mwtai palailayu.
Osa mwtaino chwng salchi (10) romwi palailayu, Talumai tei Taluangni bising eba Wanjwi tal bai sanathángkhe - Ashvin tal tei Kartik talni bisingo Osa mwtai palaijagu.
Osa mwtaini salchi (10) sal chengo - puila sal 'Mahalaya' bai, Mahalaya'ni salo Amaa Osa chini hayungo phayu, mo salo lukurok phungo daktino bacha'ui twi tukulaywi phung aisiri-siri berailayu, tei tongthoklayu.
Osa mwtaino kubuikhe tongthoklaywi palailaimani sal wngkha 'Maha Shashti' (6) tei 'Saptami' (7) ni simi, O salrokni ni simino kubuikhe Osa mwtai palaijaknani chengwi thángo Dashami eba Dussehra jora. Borokrok kwtal-kwtal ri chumwi Ama Osano nainani thánglayo, gana-gini tei hakchal-hakchal rogobo, nokni borokrok bai tei bayabsong bai Ama Osano nainani tei bini hamari nanani thánglayu. Mo haikheno 'Ashtami' (8), Navomi'o (9) bo tongthoklaywi Osa palailayu.
Phiya ba Gujarati rok Osa mwtaini, 'Maha Navami' (9) ni sal jora no 'Navratri' hwnwi palailayo tei A salo bórok 'GARBA' mwsamung mwsalaywi thongthoklayo.
Osa mwtaini Paithak sal wngkha 'Vijayadashami', O salo chwng Ama Osa no twisao tei twikhoro khibilayu, O twisa ni lama tẃino Ama Osa boni nok Chuknaha'o thángu aphuru chini bagwi tongthokmani tei khakhamani jora haibo wngu.
 |
| Chakrakma Mwtaini Kaya Gomati twima twinaro |
Tripura hao bahaikhe Osa mwtai palaijakna chengkha aboni bo kothoma tongu, abo hwnkhe hai - Bubagra Amar Manikya Chukhani lama naitukna thángphru Gomoti twima ganao bwrwima khoroksa Risá tokha sorjak, Rignai chamathwibar kanjak, tei bokhorogo Talni 'Mukut' (Crown) kanjakkhe bono nugo, A bwrwi sao - O Bubagra ang Osa nwng ano mwtai rwdi tei boromrwdi, aphuru Bubagra swngkha, Ama nono ang bahaikhe mwtai rwnai hwnwi, Aphuru Ama Osa sakha, holongo ani kaya (image) swnamdi tei Lampra bai mwtai rwdi hwnwi. Aphruni simi chini Bubagrarok Ama Osano mwtai rwnani chengo. Aboni yagulo no Chakrakma mwtaini kaya Gomati twima twinaro swnamjagu. Osano kitingwi Tripurao kwbangma kothoma tongu, phiya kwbangma lukurokno abono khwna bayakhu, A kothomarok baksa ba kubui wngwi manu phiya kwbangkukno uanamung bai wajak kothomarok mang.
Tags
Kokbwkhal