Football thwngkwrwng chwlarokni bagwi koktwma kaham O November talni salnwichisni'o (27) Inter-Sixth Schedule Premier Football League (ISPL) North East ni kaichi (9) District Council no romwi Football batailaimung wngnai Assam hasteni Bodoland Territorial Region'o. Tini TTAADC Haphangni 'Sports and Youth Affairs' ni Bg. EM Suhel Debbarma bai TTAADC ni Sports Council ni achukphang MDC Mg. Dhirendra Debbarma kokthum panda khwlai sakhlaimung rwkha.
 |
| 📷 Representative image |
O Football batailaimungo batainani bagwi TTAADC ni bwkhaktwi kaisa Team swnamjaknai hwnwi O talni sal 5 tei 6 salmari'o salnwi romwi phungni damchisa (11am) tamphuruni simi Football thwngkwrwngrokno amjogwi nai'wi Team ni bagwi borok chongjaknai tei O batailaimungo umor khajak kwrwi (no age limit) jotto umorni thwng kwrwngrokno no sep rwjaknai hwnwi Bg. EM Suhel Debbarma sakha.
O talni salnwichisni (27) salmario TTAADC ni Team Bodoland no thwngbatainani bagwi horjaknai tei thwngnairokni chámung, nẃngmung, kanmung, chumung tei thang-phainani barja naharnai TTAADC ni Sports & Youth Affairs bebek.
O batailaimungo batainai kaichuku (9) District Council rok wngkha -
Karbi Anglong Autonomous District Council (Assam), Dima Hasao Autonomous District Council (Assam), Tripura Tribal Areas Autonomous District Council (Tripura), Mara Autonomous District Council (Mizoram), Chakma Autonomous District Council (Mizoram), Lai Autonomous District Council (Mizoram), Garo Hill Autonomous District Council (Meghalaya), Khasi Hill Autonomous District Council (Meghalaya), Jayantia Hill Autonomous District Council (Meghalaya).
Sema bo Inter-Sixth Schedule Premier Football League (ISPL) ni puila Season Bodoland Territorial Region'ni (BTR) Kokhrajaro luwajijakmani, takhlai bo haino hai Bodoland Territorial Region'ni Haphang O bataimungno luwajinani chongkha. Puila Season'o BTR kaisa Goal bai Lai Autonomous District Council (LADC) no mechenwi ISPL kwplai wngkha.
Tabuk haste gwnangwi kami beser-beser Football batailaimung bai baksa kephek manwi kebengwi Football mwthwrwngjago tei thwngmungni kaham manmaribo manwi tongo tei kaham thwngkwrwng rokbo achai tongo kokhe tabuk TTAADC haphang bai naikoljak Football batailaimungo kami beser beserni thwngkwrwrok batainani sepde mano eba thẃngkwrwngrokni sinijak rokno simide sep rwjakno haphangni bwkhaktẃi. Thwngkwrwngrogno O Inter Six Schedule Football batailaimung thwngkwrwng saithani haphangni bwkhaktẃi kahamkhe naikolna nango hwnwi salai tonglaikha sijak nukjak lukurok.
Khatung khajani bisingtẃi thwngkwrwngrokno kwplai khwlaywi phaywi hasteni mung kuchuk khwlaina kobokha Bg. EM Suhel Debbarma. Tei Kwplai wngwi phaimani yagulo jotto thwngkwrwngrokno rangni sokat bo rwjaknai haphangni bwkhaktẃi hwnwi sakhlaikha.
Tags
Koktwma