Bisi 2018 no BJP bai IPFT hasteo puila haphang swnam phuru, bórokni Tiprasa bosongrokni hukumu tei laibumano borom rwmani puila tangbwtangrokno nugwi kebo uansugwi manya teiphilsa haphang swnammani yagulo aswk kegwi thánganw hwnwi. Tamono twywi khek? Swkango tamo borom yapharmani tong? Tabuk khe tamo swlaijakha? Sabo oboni twywi khorang tisai tong? Phaidi, O bebak swngmungrokni phirokmung saimanlayanw.
 |
| Bubagra Bir Bikram tei bini sajla Jubraj Krit Bikram Kishore |
Bisi 2018 no BJP bai IPFT hasteo haphang swnamani yagulo, puila Tiprasarokni hukumu tei laibumano borom rwmabai bórokni samung bwtang chengkha; Agartalani Airport ni bumungno Maharaja Bir Bikram ni mungtẃi pharwi - Tiprasarokni bisi kwdwkmani sanmungno supungwi rwkha, aboni yagulo 19 August no Bubagra Bir Bikram ni achaimasalo lelamanisal hwnwi sakhlaywi bo bono borom yapharkha. Baramura ni mungno Hathai Kotor tei Gandhacherra ni mungno Gandatwisa hwnwi swlaywi kwbangma Tiprasarokni khano khatung rwrwui mankha. Rignai-Risano hasteni borom hwnwi sinimung rwui bo kwbangma Tiprasarokni khano khatung rwkha, Mizoram hani sokokjak Bru rokno haste'o thai rwnani gosimung bai Tiprasarok teibo khatungjakha.
Phiya O thwngkwrwngni thwngmung swlaijaknani aswk dwkliya. Puila khekmung nukjakha Kokborok kokni swithaino tẃywi, BJP bai IPFT - haphang swnam phuru kwbangma Tiprasarok khakhai tonglaimani tabukle Kokborokni swithaini jwngjal komorsiwanw hwnwi, phiya tongwi tongma jwngjalno sokomornani no karwi tei kaisa jwngjalo se khiklaimani nukjakha. Tabuk khe Kokborok kokno 'Deva Nagari' swithaibai khlainani sanmung kasamani nukjak tongu.
Aboni yagulo, CAA hai kosom kerong Tripura haste'o phwnangnani chaitokmung, haktorni kerongchapnogo khlaijakha. Abono sejana thángwi khorokdok (6) Tiprasarok silaiguli machanani nangkha, tei kwbangma Tiprasarok bórokni langma bo chokha O chobao. Aborokno karwi bo kwbangma 'Anti-Tiprasa' raidarok phwnangna naimani nukjakha, Kokborok kokno karwi tongmanirok, Tiprasa mungwnang rokno borom yapharya wngmarok bebak 'Anti-Tiprasa' samungo hwnwi no chwng khobnai.
Tabuk bo thayo abo sokphaimani kwlaikha hwnkhe, bisi 2020 ni simi 19 August brum-brumno Bubagra Bir Bikram ni achaimasalo lelamanisal hwnwi sakhwlaimani yagulo, bisi brum-brum O sal lelamasal haikheno naichomjagwi phaywi tongu, tei Haphangbai sarokjakma Calendar'o bo O salo 'Maharaja Bir Bikram Manikya Bahadur Birthday' hwnwi mamang swijagwi phayu, phiya General Administration (S.A) Department phainai 2024 bisi ni Calender tei lelamasalrokni bwtang sarok phuru, August 19 no 'Birthday of Bir Bikram Manikya Bahadur' hwnwi simi sarokmani nukjakha. Aro Bubagra Bir Bikram no 'Maharaja' ni borom rwjakna tongmanino norwi 'Bir Bikram Manikya Bahadur' hwnwi simi swijakha. Tabuk oro koksilchamung kasa'o General Administration (S.A) Department - Haste haphang ni dagimung de obono norkhna? Abo sitwtwi no normani sijago, tamni hwnkhe aboni slai swkang bisini Calendar-rogo 'Maharaja' hwnwi no borom yapharjagwi phayu, phiya phainai 2024 bisini Calendar tei lelamasalrokni bwtango simi abo norjakma nukjakha. Bubagra Bir Bikram sakbaithang de 'Maharaja' borom yakarwi rwkha? Ihin', hwnkhe tangwi A borom norjakna nangkha? General Administration (S.A) Department ni borokrok ba Bubagra Bir Bikram no 'Maharaja' hwnwi saimanya de? Chwng khakhayo obo Tiprasarokni laibumano yakungbai usta khumanise kwlayu hwnwi. Haini bagwino O kokno teisa sathai kwlayu, BJP haphangni 'Anti-Tiprasa' naharmungrok tabuk swraikhe sijaknani chengwi tongkha, hwnwi.
O chaya naharmungrokno nugwi phasalo Twipra Students' Federation ni adongrok General Administration (S.A) Department'o thángwi bórokni sejamung phunukha, tei jeswk dakti mansak O Notification swlaywi Bubagra Bir Bikram ni mungno borom bai 'Maharaja' thepaui kwtalkhe saroknani koimung bwlai yapharlaikha. O sanmung supungya hwnkhe TSF rok Secretariat bwskango achuknani hwnwi sakha. Montri Sukla Charan Noatia no bo O chaya Notification no tẃywi saimanrwkha hwnwi TSF rok sakha, bóbo oboni tẃywi yapri naharnai hwnwi kok yapharkha.
Bubagra Bir Bikram no bini borom rwnani poknani oro kokse kasaya, phiya amtwi no khlaikha tabuk BJP bai IPFT ni haphang.
UPDATE: TSF ni O Memorandum ni yagulo General Adminstration (S.A) Department - teisa kwtalkhe Calendar tei lelamasalrokni bwtangno saroknani hwnwi sakhlaikha.