 |
| Bisi brwichibrwi (44) romwi Kokborok ni swithaino tẃywi Tiprasarok thwngjagwi phaimani. |
Taklai bisini CBSE ni Secondary tei kuchuk Secondary (SSCE) amjokmungrokni bwtang (schedule) sarokjakmani bisingtẃi sa'ui mankha kuchuk Secondary (SSCE) ni Kokborok Subject ni amjokmung bwskangni 15 February'o wngnai tei Secondary ni Kokborok amjokmung 24 February'o wngnai.
Amswk jora, bebakno kahamkhu. Tabuk jwngjal boro achai hwnkhe - Haste haphangni dagimung bai CBSE ni swngmung bwlairokno (Question Paper) saroknani no tẃywi khe juda raida naharjak tongmano tẃywi se. Haste haphang tei abobai kwrwngjak bedekrok; TBSE, SCERT, Directorate of Kokborok & OML, Rwngmung Bedek (Dept. of Education), TRI akosong, Kokborok ni swithaino tẃywi laithángnai bisi brwichibrwi (44) romwi, je sitra thwngmung thwngwi phaimanino - O bisiknwi-bisiktham jorao waikwbang joraono oboni tẃywi salaijak phaikha.
Hasteni jottoni slai mungwnang News Channel, News Venguard, O kokno tẃywi tabuk bai kaichichar (18) 'Live Talk Show' luajikha, tei O jwngjalni buchuk buji'ui bini paithak bumuk naituknani bo chaitokha.
19 December 2023 salmario - News Venguard kaisa koksalaimung panda eba Conclave kaisa luajikha, O swithaini jwngjalno tẃywi kaisa paithak bumuk de naitugwi manno hwnwi, aro mungwnang Linguist Pavitra Sarkar no bo Kolkata ni nunghorjakha. Bugrakhor Agulini (Agartala) Muktadhara Theatre'o, College ni rwngswrwngnai, University ni rwngswrwngnai, Professor rok, rwngphwnangnairok, swikwrwngrok, hasteni sinai-nuknairok bai baksa koklam bo kahamkhe salaijakha.
A pandani yagulo abono khakhlaijakha, tabukle haste haphangni bwkhaktẃi O jwngjalno thamuknani bagwi yapri naharjaganw, hwnwi. Phiya aro tamo sijakha hwnmale - tabuk phano haphang bisi 44 kwcham uansukmungo no kwchajakhu eba kwcha'ui tongnani muchungkhu.
Haini bagwi oro kwbangma swngmung-no kasao, tamni hwnkhe kwbangkuk English Medium ni rwngswrwngnairok Bangla swithai bai aswk sinilaijakya, hwnkhe bórokni jwngjalno uansugwi bórokni bagwi Kokborok ni swngmung bwlai (Question Paper) bo kainwi Bangla tei Roman swithai baino karijakthai. Phiya haphangni bwkhaktẃi khe hai hwnwi se sajakha, swngmung bwlairokno CBSE kainwi swithai bai sarogwi manya hwnwi. Phiya ulo tamo nukjakha hwnmale - kaisa Circular'o Education Officer Smt. Chandni Chandran ni gosimung bai Tripurani rwngswrwngnairokni bagwi bisiktham jora Bilingual eba kainwi kokbai amjokmung khlaijaknai hwnwi.
Hwnkhe mo swngmungrok haino kasa'ui phaya, CBSE bai khlaijaknai amjokmungo jotto subject ni bagwi swngmung bwlai (Question Paper) tei phirokmung bwlai'o (Answer Sheet) kainwi English tei Wanjwi (Bangla) kokbaino khlaywi manu hwnkhe, Kokborok Subject ni phuru bo de abo kainwi baino wngnai. - Swinani bagwi jwngjal le boro kasa'ui tongkha? Tangwi lama kaisao kainwi bwthai wngnani nang? Haphang oboni phirokmung rwde-rwno?
Haphang tei abobai kwrwngjak bedekrok, kwbangma jora O swngmungrok bai swngjakphuru kaisa phirokmung mamangno rwmani nukjagu "Abo haphangni 'Policy Decision' se" hwnwi. Kisa sal swkang News Media rogo Kerongchapnokni kokchaplaimani mangpilirogo khoroksa Montri ni kokphirokmungo 'abo kaisa Policy Decision' hwnwi samani nukha. Haphang O kokno tẃywi swrai-swrai khlaithai kwlayo, buphuru tei bisi ni bo tal tei bo salmario Kokborok ni swithaino tẃywi Haphang O 'Policy Decision' hwnmani naharkha? Sabo sabo aphuru Council of Minister'o tong? Sabo bai abo twiduljakha? Tei O 'Policy Decision' naharjakma yagulo bo Circular ni bisingtẃi kwrwngjak habanokrogo obo phwnangnani dagimung rwjakha, aboni tẃywi haphang kisa sa'ui de mano?
Taklai bisi'o, Kokborok kok sanai rwngswrwngnairok CBSE bai khlaijaknai Board amjokmungo achuknai. Oro tabuk kebo phano bujinani rwngya de, swngmungrok kahamkhe pori'ui manyani bagwi, kwbangma amjokmungo achuknairok bórokni kuchuk beremni rwngswrwngmungni dugarok sojagwi mannu, hwnwi - amjokmungo kahamkhe swywi manyani bagwi, result kaham tubui manyani bagwi. O rwngswrwngnairokni kwchwng thinangni lamao busu bo'ui rwmani hai hamya samungrokno tẃywi lukurokni jolimung tabuk belai kasajak. O jolimung tabuk jephuru phano perwi thángwi manu. Tabuk swngmung kotorkhe abono, sabo aboni barja naharnai?
Contributing Columnist
Kokbiti by Bikashrai Debbarma,
President Kokborok Kokrwbai Buthu (Kokborok Sahitya Sabha)