Phainai 28 February, 2024 salmarini simi Hatai Kotor'o Bubagra Pradyot Kishore Debbarma thwiyasak chaya'ui tongnani hwnwi sakhlaima bai haste gwnangwi'no uanalaijak lukurok. Tiprasarokni bagwi Permanent Constitutional Solution sanwi manya wngma bai, abotẃi hai yapri senani nangkha hwnwi sakha TIPRA Motha ni adongrok. Bubagra ni O thwiyasak chaya'ui tongnani sakhlaimung achumasa wngwi phaya, bisisa romwi haktor haphang bai koksalaimani yagulo bo mungsa bwthai manyani wngma bagwi se paithago O kwrak yapri senani nangkhna.
 |
| From right: 1) Bubagra Pradyot Kishore Debbarma, 2) KCR, 3) KCR, and 4) Potti Sreeramulu |
Tiprasani manthaini sanmung sanna bagwi thwiyasak chaya'ui tongnani hwnwi sakhlaima bai lukurokbo tabukle mungsaswk mannanw hwnwi khaphurlaijak. Tamni hwnmale thwiyasak-chaya tongwi, kwbangma sanmungrokno supungwi rwjakmani chini laibumao chwng nugu, sakni manthai tei dophani manthaini bagwi thwiyasak chaya tongnani abo kwtal kokya. Mahatma Gandhi kwthang tongphuru Barotno Ingrejrokni yakni phiyokrwna bagwi waikwbangno chaya'ui tongkha. India eba Barot haktor phiyokjakma yagulo bo amotwi hai sanmung manna bagwi chaya tongwi khadumung phunukmani nukjakha.
Abo haikheno bisi 1953'o Potti Sriramulu bo Telugu bosongni borokrokni bagwi Madras haste ni swkagwi juda haste swnamnani sanmungo thwiyasak-chaya tongkha, bó mungsaphano chaya'ui sal 56 jora tongkha, phiya aswk sal kwdwkma chaya tongma bagwi bó bini langma chónani nangkha, bini thwimani yagulo Telugu harogo kotor urpatilaimung nukjakna nangkha.
Hai hwnwi sajago - Potti Sreeramulu thwimani salbrwi (4) ni yagulo no aphuru ni Montri Bokhorok Jawaharlal Nehru, Andhra Haste swnamnani hwnwi sakhlaimung rwkha. Potti Sreeramulu ni choba baise Telugu koksanairokni bagwi October 1, 1953'o Andhra Haste swnamjakha.
Bisi 2009 ni paithak phasingo bo abo haikheno, haino hai Andhra Pradesh ni khagwi Telangana no juda haste swnamrwnani bagwi haktorni Parliamento Telengana Bill no boksanani sanmungo Kalvakuntla Chandrashekar Rao eba KCR thwiyasak-chaya'ui tongna hwnwi sakhlaikha, KCR salchisa (11) chaya'ui tongmani yagulo haktor haphang Telengana haste swnamnani gosikha. Haikheno 2 June, 2014'o Telengana no haste hwnwi swnamwi rwjakha.
Aborokno naharwi Tripura'o bo, Tiprasarokni bisi kwdwkmani sanmungrokno mannani bagwi thwiyasak-chaya'ui tongnani-no karwi, tei swrai swrai lama nukhorjakliya no hwnwi manno. Haini bagwi Tiprasarokni bagwi Permanent Constitutional Solution mannani bagwi thwiyasak-chaya'ui tongnani simi ni paithak lama kaisa tongsio hwnwi chwng saui manu. Phiya oro bo Andhra tei Jai Telangana Movement ni hai mangpili de nukjakphino? Abo jora simi sa'ui mannai.