"Tiprasarok O hayungni jottoni slai talikha hamya bosongo khobjakna, chini sakbaithangni chikon-chikon manthai manna bagwi phano se bui swkango yak maphehelayu".
 |
| From right: 1) Bubagra Pradyot Kishore Debbarma, 2) Bijoy Kumar Hrangkhawl, 3) Biswajit Kalai, etc. |
Bisi 1949'o Barot haktor bai Tripura 'Merger Agreement' khlaimani simi tabukswk jora Tiprasarok sakbaithangni manthai manna bagwi kwbangma chobao ongkhorlaikha, sakni kok Kokborokno haste haphangbai gosi'ui naharjakna bagwi, aboni yagulo TTAADC tei Sixth Schedule manna bagwi, tei aboni yagulo sakni hukumu tei laibumano mwthangwi narwknani bagwi, tei aboni yagulo Kokborok no Roman swithai bai swirwna bagwi, twi aboni yagulo Tipraland tei tabuk Greater Tipraland ni bagwi, oro khújak bebak choba'o no, tongkosong Tiprasa lukurok bórokni thwimangphang, kolomtwi tei sakni langmano khiklaywi O chobarogo nongkhorlaikha.
Phiya O bebak choba'o nongkhornai Tiprasarokni sanmung le tamo? Bórok tamo nai? Bórok tamo sán? Chwng kaham khe sa'ui mano, O Tiprasa lukurok sak-sakni bagwi mungsa nangya, sak-sakni bagwi mungsa sanya, haiphano, kwmajak bórok ni borom, bórokni Hano simi phano de kiphilwi manno, abono chongwi se bebak yakarwi, O choba'o kwbangma thwngkwrwng bodolrokno logi rwlaiphayu, bórok saimanu sakbaithangni bagwi mungsa manwi manya, phiya bórokni bwsa-bwtwi ni thinang phano de kaham wngwi manno, A khakhamung bai simi se Tiprasarok, bebak choba'o nongkhormani nuknai.
Phiya Tiprasarok tei bwswk manasing khunai kho? Tini 28 February srangsalo, Bubagra Pradyot Kishore Debbarma bai ringjak Tiprasarokni 'Permanent Constitutional Solution' manyasak chaya'ui (Fast Unto Death) tongwi thángnani choba'o, haste gwnangni tongkosong Tiprasa lukurokno bóno logirwnani phailaikha, baksa thuyam tubui, baksa ba bwsa-bwtwi tubui je nangsak tongwi thángnani bagwi phailaibaikha. Phungni damchisa (11am) ni simi Hathai Kotoro, O Thwiyasak-chaya'ui thángnani choba naichomlaijakma chengkha, haiphano dangsa (stage) sakao lukurokni swkango koklam sa'ui tongphuruno Haktor haphang bai ringjagwi Bubagra dangsa yakarwi Delhi'o mathangkha. Thángna swkang lukurokno tabuk aswk tatongthoklaikhudi hwnwi sa'ui kwlangkha, tei bó kiphilyasak orono je tongna muchungnairok tongwi mannu, tei bó teibo saka bebak kaham hamya koktwmarok bó orono phaywi lukurokno sakhlaiphainai.
Bisi Snichi (70) romwi Tiprasarok je manthaini karjagwi tongmano tabuk manna phasingo de thángwi tong? Tiprasarok 'Permanent Constitutional Solution' ni bagwi tei waibwswk Delhi'o laisuna nangnai? Bubagra Delhi'o thángna swkang abobo kok rwui kwlangkha, chini manthaino 'swywi' rwyasak chwng gosiya tei chini chobano rosaya. Tabuk abono sa'ui manno O choba tabuksak jora payakhu, phiya tei bwswk lokkhuno abono se manailaithai.